بۇرىنعى ۇلتتىق ەكونوميكا ءمينيسترى قۋاندىق بيشىمباەۆتىڭ ءىسى بويىنشا ەكىنشى ايىپتالۋشى باقىتجان بايجانوۆ بيشىمباەۆتىڭ وعان قىسىم كورسەتىپ جاتقانىن ايتتى، - دەپ حابارلايدى "ادىرنا" ۇلتتىق پورتالى.
سوت وتىرىسىندا بايجانوۆتىڭ ادۆوكاتى سوتتان «سوتتالۋشى بيشىمباەۆ پەن سوتتالۋشى بايجانوۆتىڭ بولەك وتىرعىزۋىن» سۇرادى.
"بيشىمباەۆتىڭ بايجانوۆپەن بايلانىسۋ مۇمكىندىگى بولماۋى ءۇشىن وسىلاي جاساۋ كەرەك بولادى. بۇل - بايجانوۆتىڭ قالاۋى. بايجانوۆ وعان قىسىم جاسالىپ جاتقانىن ايتتى", - دەدى ادۆوكات سوتتا.
سوتتالۋشى بايجانوۆ قورعاۋشىسىنىڭ ءسوزىن راستادى.
«ول (بيشىمباەۆ – جۋرناليست) ماعان: «مىنانى ايت، مىنانى ايت» دەپ جان-جاقتى قىسىم كورسەتۋدە. ايعاققا قاتىستى ايتىپ جاتىر»، - دەدى ول سۋدياعا.
ەستەرىڭىزگە سالا كەتەيىك، بۇعان دەيىن بيشىمباەۆ سوت وتىرىسىندا نۇكەنوۆانى ولەر الدىندا قالاي سوققىعا جىققانى جايلى ءوز نۇسقاسىن ايتىپ بەرگەن بولاتىن. سونداي-اق، ونىڭ ادۆوكاتتارى سوتتا جالعان دەرەك كورسەتكەنى ءۇشىن سۋديادان ەسكەرتۋ الدى.