رەسەيدە تاجىكستان ازاماتشاسى ادىراسپان وسىمدىگىن ەلگە الىپ كىرمەك بولعانى ءۇشىن سەگىز جىلعا باس بوستاندىعىنان ايىرىلدى. بۇل تۋرالى «ازيا-پليۋس» باسىلىمى تاجىكستان باس پروكۋراتۋراسىنا سىلتەمە جاساپ جاريالادى، دەپ حابارلايدى "ادىرنا".
تاجىكستان ازاماتشاسى رەسەيدىڭ ءبىر اۋەجايىندا ۇستالدى. وعان رەسەي فەدەراتسياسى قىلمىستىق كودەكسىنىڭ 228-بابى 2-بولىگى («ەسىرتكى زاتتارىن ساتۋعا ماقساتسىز ساقتاۋ، تاسىمالداۋ، ءوندىرۋ جانە وڭدەۋ») جانە 229.1-بابى 3-بولىگى («ەسىرتكى زاتى بار وسىمدىكتەردى رەسەي كەدەن شەكاراسى ارقىلى زاڭسىز وتكىزۋ») بويىنشا ايىپ تاعىلدى.
«تەرگەۋ اياقتالعاننان كەيىن قىلمىستىق ءىس سوتقا جىبەرىلىپ، سوت ايىپتالۋشىنى 8 جىلعا باس بوستاندىعىنان ايىرۋ تۋرالى ۇكىم شىعاردى»، — دەپ مالىمدەدى تاجىكستان باس پروكۋراتۋراسى.
بۇل ءىس بويىنشا باسقا مالىمەتتەر جوق. سونىمەن قاتار، تاعى ءبىر تاجىكستاندىق ازاماتشا رەسەيدىڭ باسقا اۋەجايىندا ءدال وسىنداي ايىپپەن ۇستالعانى ايتىلعان، بىراق ونىڭ ءىسى بويىنشا سوتتىڭ شەشىمى حابارلانباعان.
باس پروكۋراتۋرا تاجىكستان ازاماتتارىن ادىراسپان وسىمدىگىن رەسەيگە الىپ كىرۋ جانە قولدانۋ ارەكەتتەرىنەن باس تارتۋعا شاقىردى. ۆەدومستۆونىڭ مالىمەتىنشە، «10 دانادان ارتىق حازوريسپاند» تاسىمالداعان نەمەسە ساقتاعان ادامعا 1 ميلليون رۋبلگە دەيىن ايىپپۇل نەمەسە ءومىر بويىنا باس بوستاندىعىنان ايىرۋ جازاسى قاراستىرىلعان.
2024 جىلدىڭ اقپان ايىندا ادىراسپان رەسەيدە ەسىرتكى قۇرامدى وسىمدىكتەر تىزىمىنە ەنگىزىلگەن. بۇل شەشىمنىڭ سەبەبى — قۇرامىندا ورتالىق جۇيكە جۇيەسىن قوزدىراتىن ءارى گالليۋتسينوگەن اسەرى بار گارمين زاتىنىڭ بولۋى. ول ءتىپتى ءبىرىنشى قولدانۋدان-اق ادامنىڭ دەنساۋلىعىنا اۋىر زيان كەلتىرۋى مۇمكىن.
ال ورتالىق ازيا ەلدەرىندە بۇل وسىمدىككە سۇرانىس جوعارى جانە وعان ەرەكشە ءمان بەرىلەدى: حالىق اراسىندا ادىراسپان ساتتىلىك، بايلىق اكەلەدى، جامان ەنەرگيا مەن اۋرۋلاردان قورعايدى دەپ ەسەپتەلەدى. ادىراسپاندى كوبىنە تۇتاتىپ، تۇتىنىمەن ءۇيدى جانە ادامداردى الاستايدى. تۇرىكمەنستاننىڭ بۇرىنعى پرەزيدەنتى گۋربانگۇلى بەردىمۇحامەدوۆ بۇل وسىمدىكتى ءوزىنىڭ اۆتورلىعىمەن شىققان «تۇرىكمەنستاننىڭ دارىلىك وسىمدىكتەرى» اتتى كىتاپتىڭ ءبىرىنشى تومىنا ەنگىزگەن. تۇرىكمەندەر ادىراسپاندى يۋزارلىك دەپ اتايدى.
