اۋىلعا جۇمىسقا كەلگەن مەديتسينا قىزمەتكەرلەرى ءۇشىن 10 ملن تەڭگە جاردەماقى بەرىلۋى مۇمكىن. بۇل تۋرالى ءماجىلىس دەپۋتاتى اسحات ايماعامبەتوۆ Telegram ارناسىندا جازدى، دەپ حابارلايدى “ادىرنا” ۇلتتىق پورتالى.
قۇرمەتتى دارىگەرلەر مەن دەنساۋلىق ساقتاۋ سالاسىنىڭ قىزمەتكەرلەرى! سىزدەردى كاسىبي مەرەكەلەرىڭىزبەن قۇتتىقتايمىن! سىزدەردىڭ ماماندىقتارىڭىز – ەڭ قيىن، جاۋاپتى جانە اسىل ماماندىقتاردىڭ ءبىرى. سىزدەر كۇن سايىن مىڭداعان ادامداردىڭ ءومىرىن ساقتاپ قالىپ، ناعىز ەرلىك جاساپ جۇرسىزدەر. پرەزيدەنتتىڭ تاپسىرمالارىنا سايكەس سوڭعى جىلدارى جالاقى كوتەرىلىپ، جاڭا دەنساۋلىق ساقتاۋ نىساندارى سالىنىپ جاتىر، – دەپ جازدى دەپۋتات.ونىڭ ايتۋىنشا، قازىر الەۋمەتتىك-مادەني دامۋ كوميتەتى دەنساۋلىق ساقتاۋ تۋرالى زاڭ جوباسىن قاراستىرىپ جاتىر. وندا مەديتسينا قىزمەتكەرىنىڭ مارتەبەسىن بەكىتۋ، دارىگەرلەردى الەۋمەتتىك قولداۋ جانە قۇقىقتىق قورعاۋ بويىنشا قوسىمشا شارالاردى قاراستىرۋ ماڭىزدى. وسى ماقساتتا كوميتتەتىڭ دەپۋتاتتارى بىرقاتار تۇزەتۋلەرگە باستاماشىلىق جاسادى.
اۋىلعا جۇمىسقا كەلگەن مەديتسينا قىزمەتكەرلەرى ءۇشىن 10 ملن تەڭگە مولشەرىندە كوتەرمە جاردەماقى بەلگىلەۋ جونىندەگى نورمانى زاڭعا ەنگىزۋ تۋرالى تۇزەتۋ ەنگىزىلدى. سونداي-اق الەۋمەتتىك مەديتسينالىق ساقتاندىرۋ قورىنا ءوز جارنالارىن تولەيتىن بارلىق مەديتسينا جانە ءبىلىم بەرۋ قىزمەتكەرلەرىنىڭ جىل سايىنعى، مىندەتتى مەديتسينالىق تەكسەرۋدەن تەگىن ءوتۋى، ياعني ءمامس ەسەبىنەن ءوتۋى تۋرالى نورما ۇسىنىلدى. ۇكىمەتتىك نۇسقادا زاڭ جوباسىندا 2025 جىلدان باستاپ مەديتسينا قىزمەتكەرلەرىنىڭ وزدەرى كاسىپتىك جاۋاپكەرشىلىكتى ساقتاندىرۋ بويىنشا جىل سايىنعى ساقتاندىرۋ اقىلارىنىڭ 50%-ن تولەۋگە مىندەتتەۋ كوزدەلگەن. بۇل رەتتە كوميتەت دەپۋتاتتارى 100% ساقتاندىرۋدىڭ بارلىق سوماسىن جۇمىس بەرۋشىنىڭ ەسەبىنەن جابۋدى ۇسىنىپ وتىر.سونىمەن قاتار، مەديتسينا قىزمەتكەرلەرىنىڭ مارتەبەسىن ارتتىرۋ ءۇشىن بالالارىن بالاباقشالارداعى ورىندارمەن باسىم تارتىپپەن قامتاماسىز ەتۋ، دەمالىستاردىڭ ۇزاقتىعىن ۇلعايتۋ جونىندەگى نورمالار ۇسىنىلۋدا، سونداي-اق وزدەرىنىڭ كاسىبي مىندەتتەرىن اتقارۋ كەزىندە قايتىس بولعان نەمەسە مۇگەدەك بولعان مەديتسينا قىزمەتكەرلەرىنىڭ بالالارى ءۇشىن جوعارى ءبىلىم بەرۋ گرانتتارىن ءبولۋ كەزىندە باسىم قۇقىقتى بەلگىلەۋ بولىگىندە تۇزەتۋ ەنگىزىلدى. اسحات ايماعامبەتوۆ مەديتسينا قىزمەتكەرلەرىن قۇقىقتىق قورعاۋ جونىندەگى نورما جانە دارىگەرلەردى قورعاۋعا باعىتتالعان باسقا دا نورمالار ۇسىنىلىپ وتىرعانىن جەتكىزدى بۇگىندە بۇل تۇزەتۋلەر ۇكىمەتتىڭ قاراۋىنا جىبەرىلدى.
ۇقساس جاڭالىقتار
