قىرعىزستان ۇلتتىق قاۋىپسىزدىك مەملەكەتتىك كوميتەتى جەڭىس كۇنىن اتاپ ءوتۋ كەزىندە «Z» ءارپى بار كيىمدەردى كيمەۋگە شاقىردى. بۇل تۋرالى قىرعىزستان ۇقمك ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
قىرعىزستان ۇقمك ءباسپاسوز قىزمەتىننىڭ مالىمەتىنشە، ينتەرنەتتە 9 مامىر – جەڭىس كۇنىنە وراي، Z بەلگىسى بار اسكەري كيىمدەر مەن كوستيۋمدەردى جالعا بەرەتىن كومپانيالار كوپشىلىك تالقىسىنا تۇسكەن.
«ۇلتتىق قاۋىپسىزدىك ورگاندارى كارناۆال كوستيۋمدەرىن جالعا بەرەتىن ۇيىمداردى ۇلتارالىق ارازدىقتى قوزدىرۋعا ىقپال ەتەتىن اسكەري كيىم مەن «Z» سيمۆولى بار كوستيۋمدەردى جالعا بەرمەۋگە، سونداي-اق، قالا تۇرعىندارىن 9 مامىردا ۇلى وتان سوعىسىنداعى جەڭىس كۇنىنە وراي وتەتىن «ماڭگىلىك پولك» شەرۋىندە اتالعان كيىمدى كيمەۋگە شاقىرادى»، – دەلىنگەن حابارلامادا.
سونىمەن قاتار، ۇقمك ۇلتارالىق ارازدىقتى قوزدىرۋعا باعىتتالعان ءىس-ارەكەتتەر ءۇشىن جاۋاپكەرشىلىك كوزدەلگەنىن ەسكەرتتى.
”ادىرنا” ۇلتتىق پورتالى
