قازاقستان رەسپۋبليكاسى پارلامەنتى سەناتى توراعاسىنىڭ ورىنباسارى اسقار شاكىروۆ پەن وزبەكستان رەسپۋبليكاسى ولي مءاجءىلءىءسىنىڭ سەناتى توراعاسىنىڭ ءبىرىنشى ورىنباسارى، كوميسسيانىڭ وزبەكستان تاراپىنان تەڭ توراعاسى سودىك سافوەۆ باستاعان جۇمىسشى توپ ارال اۋدانىنداعى كوكارال بوگەتىنە بارىپ، جاعدايىن كوردى. بۇل تۋرالى وبلىس اكىمىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
ەكى ەلدىڭ سەنات دەپۋتاتتارىمەن بىرگە وبلىس اكىمى نۇرلىبەك نالىباەۆ، قر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشەۆ، سۋ رەسۋرستار كوميتەتىنىڭ توراعاسى نۇرلان الدامجاروۆ بوگەتتىڭ قازىرگى جاعدايىن باقىلاپ، ورتاق ماسەلەلەردى تالقىلادى.
بوگەت باسىندا سۋ رەسۋرستارى كوميتەتىنىڭ توراعاسى نۇرلان الدامجاروۆ «ساراتس» جوباسىنىڭ ەكىنشى كەزەڭىن جۇزەگە اسىرۋ بارىسىن جەتكىزسە، وبلىس اكىمىنىڭ ورىنباسارى قايرات نۇرتاي ارال تەڭىزىنىڭ قۇرعاعان تۇبىندە سۋ تاپشىلىعىن ازايتۋ جونىندە قابىلدانىپ جاتقان شارالار جانە فيتو-مەليوراتسيالىق جۇمىستاردى تىزبەكتەدى.
كوكارال بوگەتىنىڭ ۇزىندىعى - 13 كم، ەنى - 9 م. ارال تەڭىزىنىڭ سولتۇستىك بولىگىن ساقتاپ قالۋ ءۇشىن كوكارال بوگەتىن قالپىنا كەلتىرۋ جۇمىستارى 2002 جىلدان باستاپ 2008جىلعا دەيىن جۇرگىزىلگەن. ناتيجەسىندە سۋ كولەمى 11,5 كم3-گە، ياعني، 15,6 كم3-دەن 27,1 كم3-گە دەيىن ارتتى. سونىمەن قاتار بالىق شارۋاشىلىعىن دامىتۋ ءۇشىن قولايلى جاعداي جاسالدى. ناتيجەسىندە بالىق اۋلاۋ كولەمى 0,4 مىڭ توننادان 7 مىڭ تونناعا دەيىن ءوستى.
«ساراتس» جوباسىنىڭ ەكىنشى كەزەڭى ىسكە اسىرعان ۋاقىتتا سولتۇستىك ارال بولىگىندە 50 كم3 سۋدى ساقتاپ تۇرۋعا قول جەتكىزەمىز. بۇل ءوز كەزەگىندە بالىق اۋلاۋ كولەمى دە ەكى ەسەگە وسەدى دەگەن ءسوز. جوبا ارال ءوڭىرىنىڭ ەكولوگيالىق جاعدايىن جاقسارتادى،-دەدى نۇرلان الدامجاروۆ.
دەلەگاتسيا وكىلدەرى سۋ جاعدايىنا قاتىستى ورتاق ءماسەلەنى ارنايى جيىندا قارايدى.
”ادىرنا” ۇلتتىق پورتالى
