ەلىمىزدەگى كەدەيلىكتىڭ ەڭ جوعارى دەڭگەيى تۇركىستان مەن ماڭعىستاۋ وبلىستارىندا تىركەلدى، دەپ حابارلايدى “ادىرنا” ۇلتتىق پورتالى.
ءۇي شارۋاشىلىقتارىن زەرتتەۋ دەرەكتەرى بويىنشا، 2021 جىلى تابىسى ەڭ تومەنگى كۇنكورىس دەڭگەيى شاماسىنا جەتپەيتىن حالىق ۇلەسى 5,2% قۇرادى (2020 جىلى – 5,3%). 2021 جىلى وڭىرلەر بولىنىسىندەگى كەدەيلىكتىڭ ەڭ جوعارى دەڭگەيى تۇركىستان (9,8%), ماڭعىستاۋ (8,6%) وبلىستارىندا، ەڭ از ۇلەسى – نۇر-Cۇلتاندا (2,2%) تىركەلدى، – دەيدى ۇلتتىق ستاتيستيكا بيۋروسى.
«كەدەيلىك دەڭگەيى – ەڭ تومەنگى كۇنكورىس دەڭگەيى شاماسىنان تومەن تابىسى بار (تۇتىنۋعا پايدالانىلعان) حالىق سانىنىڭ حالىقتىڭ جالپى سانىنا شاققانداعى پايىزدىق قاتىناسى. 2021 جىلى ەلىمىز بويىنشا جان باسىنا شاققانداعى ەڭ تومەنگى كۇنكورىس دەڭگەيىنىڭ شاماسى ورتا ەسەپپەن ايىنا 37 266 تەڭگەنى قۇرادى. بۇل رەتتە، ءار ايماقتىڭ ءوزىنىڭ ەڭ تومەنگى كۇنكورىس دەڭگەيى ەسەپتەلەدى»، – دەپ ءتۇسىندىردى ۇلتتىق ستاتيستيكا بيۋروسىنىڭ ەڭبەك جانە تۇرمىس دەڭگەيى ستاتيستيكاسى دەپارتامەنتىنىڭ ديرەكتورى ناتاليا بەلونوسوۆا.
“ادىرنا” ۇلتتىق پورتالى
