Elimizdegi kedeıliktiń eń joǵary deńgeıi Túrkistan men Mańǵystaý oblystarynda tirkeldi, dep habarlaıdy “Adyrna” ulttyq portaly.
Úı sharýashylyqtaryn zertteý derekteri boıynsha, 2021 jyly tabysy eń tómengi kúnkóris deńgeıi shamasyna jetpeıtin halyq úlesi 5,2% qurady (2020 jyly – 5,3%). 2021 jyly óńirler bólinisindegi kedeıliktiń eń joǵary deńgeıi Túrkistan (9,8%), Mańǵystaý (8,6%) oblystarynda, eń az úlesi – Nur-Cultanda (2,2%) tirkeldi, – deıdi Ulttyq statıstıka bıýrosy.
«Kedeılik deńgeıi – eń tómengi kúnkóris deńgeıi shamasynan tómen tabysy bar (tutynýǵa paıdalanylǵan) halyq sanynyń halyqtyń jalpy sanyna shaqqandaǵy paıyzdyq qatynasy. 2021 jyly elimiz boıynsha jan basyna shaqqandaǵy eń tómengi kúnkóris deńgeıiniń shamasy orta eseppen aıyna 37 266 teńgeni qurady. Bul rette, ár aımaqtyń óziniń eń tómengi kúnkóris deńgeıi esepteledi», – dep túsindirdi Ulttyq statıstıka bıýrosynyń eńbek jáne turmys deńgeıi statıstıkasy departamentiniń dırektory Natalıa Belonosova.
“Adyrna” ulttyq portaly
