قىزىلجاردا قالالىق اكىمدىك جەتىمدەردى تۇرعىن ءۇي كەزەگىنەن الىپ تاستاعان. ال بالالار ءۇيىنىڭ تۇلەكتەرى ونان حابارسىز بولىپتى، دەپ حابارلايدى “ادىرنا” ۇلتتىق پورتالى “استانا” ارناسىنا سىلتەمە جاساپ.
قازىر وبلىس ورتالىعىندا پاتەر كەزەگىندە 15 مىڭعا جۋىق ادام تۇر. ونىڭ 1700-دەن استامى – اتا-انا قامقورلىعىنسىز قالعاندار. ولاردىڭ باسىم بولىگى باسپانالى بولۋ ءۇشىن اكىمدىكتىڭ تىزىمىنە 10 جىل بۇرىن ەنگەن. ال بىلتىر كەزەكتىڭ قالاي جىلجىپ جاتقانىن ءبىلۋ ءۇشىن اكىمدىككە بارعاندا، تىزىمدە جوق ەكەندەرىن ءبىلىپتى. شەنەۋنىكتەر بۇل كەلەڭسىزدىكتى اقپاراتتىق بازانىڭ جاڭارتىلۋىمەن ءتۇسىندىردى.
“تەحنيكالىق اقاۋلارعا بايلانىستى بىزدە جەتىمدەر ساناتىندا تۇرعان ازاماتتار كەزەگىنەن الىپ تاستالىنعان بولاتىن. ءبىز تەكسەرۋ جۇرگىزۋ اياسىندا وسىنداي پروبلەما بار ەكەنىن انىقتادىق. قازىرگى تاڭدا ناۋرىزدىڭ 24 كۇنى جاڭاعى 49 ازاماتتىڭ بارلىعى ءوز كەزەگىنە قايتا قويىلدى. كەزەگىنەن جىلجىعان جوق”، – دەيدى پەتروپاۆل قالاسىنىڭ اكىمدىگى تۇكش ءبولىمىنىڭ ءباسپاسوز حاتشىسى اسەم ايتۋلوۆا.
ال پروكۋراتۋرا ورگاندارى ماسەلە تەك تەحنيكالىق اقاۋدا ەمەس دەپ ەسەپتەيدى. قۇزىرلى ورگان بۇل وقيعاعا تىكەلەي قاتىسى بارلاردى قازىر انىقتاپ جاتىر.
“قالا پروكۋراتۋراسى الەۋمەتتىك از قامتىلعان ازاماتتاردى كەزەككە قويۋ بويىنشا ساراپتاما جۇمىستارىن جۇرگىزىپ، بىرقاتار ولقىلىقتى انىقتاعان. بۇل جەردە تەك تەحنيكالىق اقاۋ عانا ەمەس، ادامي فاكتور دا بار. كەزەكتى ءبىر بازادان ەكىنشىسىنە كوشىرۋ كەزىندە بىرەۋ قاتەلەسىپ كەتكەن بولار. سوندىقتان قازىر ءبىز تەكسەرىس جۇمىستارىن قولعا الدىق”، – دەيدى پەتروپاۆل قالاسى پروەكرورىنىڭ ورىنباسارى قايسار ءابىشوۆ.
“ادىرنا” ۇلتتىق پورتالى
