قازىعۇرت اۋدانىنداعى نوسەر سالدارىنان زارداپ شەككەن تۇرعىندارعا قارجىلاي كومەك كورسەتىلە باستادى. «قىزىل جارتى اي» قوعامى 104,6 ملن. تەڭگە ءبولىپ، سۋ كىرگەن ۇيلەردەگى 1046 ادامعا (173 وتباسىنا) 100 مىڭ تەڭگە كولەمىندە اقشالاي كومەك كورسەتۋىن باستادى.
شىعىنداردى وتەۋ ءۇشىن وبلىستىق بيۋدجەتتەن دە قولداۋ كورسەتىلەدى. كوميسسيا تاراپىنان مال باسى ناقتىلانىپ، عيماراتتار مەن ۇيلەر، قوسىمشا قۇرىلىس قۇنى ەسەپتەلۋدە. وكىنىشكە قاراي، كەي نىسانداردىڭ قۇجاتى جوق، ولار دا زەردەلەۋدەن وتۋدە. جاڭا تۋعان ءتورت تۇلىككە دە وتەماقى بەرۋ جاعى قاراستىرىلماق.
ءوڭىردىڭ باسقا اۋدان، قالا جاستارى قولداپ، العاش كۇننەن باستاپ، جالپى 800-دەن استام ەرىكتى مەن وزگە دە ازاماتتار سەلدەن قۇلاعان، زاقىم كەلگەن قورا-قوپسىلارعا جانە تۇرعىن ءۇي مەن اۋلالاردى تازالاۋ جۇمىستارىنا بەلسەنە كومەك بەرۋدە. دەمەۋشىلەر، دەپۋتاتتار تاراپىنان دا قولداۋ بار.
وبلىس اكىمى ومىرزاق شوكەەۆ قازىعۇرت اۋدانىنا بارىپ، قالپىنا كەلتىرۋ جۇمىستارىمەن تانىستى. تۇرعىنداردىڭ تالاپ-تىلەگى مەن وتىنىشتەرىن تىڭدادى.
– مەملەكەت باسشىسى قاسىم-جومارت توقاەۆتىڭ تاپسىرماسىمەن، وبلىستىق كوميسسيا قۇرىلىپ، جۇمىس ىستەپ جاتىر. ەشبىر تۇرعىن كومەكسىز قالمايدى. ءۇي جانۋارلارىنىڭ شىعىنىنا ەرەجەگە سايكەس وتەماقى تولەنىپ، تۇرعىن ۇيلەر قالپىنا كەلتىرىلەدى. شارۋاشىلىق عيماراتتاردى جوندەۋگە كومەك كورسەتىلەدى. بۇنىڭ ءبارى قاتاڭ باقىلاۋدا تۇر. وزدەرىڭىز بىلەتىندەي، سۋ تاسقىنى بولعان اۋىلداردا توتەنشە جاعداي دەپارتامەنتى، جەرگىلىكتى اكىمدىكتەردىڭ قىزمەتكەرلەرى، ەرىكتىلەر جۇمىس ىستەپ جاتىر. ءار نىسان تولىق قالپىنا كەلتىرىلەدى، – دەدى ومىرزاق شوكەەۆ.
— ەلدىڭ ىشىندە بولعانىمىزعا قۋاندىق. اكىمدەر بىردەن كەلدى. جاستار ءۇيدى ءۇش كۇن ءجۇرىپ، تولىق تازارتىپ بەردى. كورشىلەر كوشۋگە كومەكتەستى. 2003 جىلى كورشى وزبەكستاننان قونىس اۋدارىپ ەدىك. سودان بەرى ءۇيدىڭ قۇجاتىن دايىنداۋعا ءمان بەرمەگەن ەكەنبىز. اكىمدىك وعان كومەك بەرىلەتىنىن ايتىپ، قۋانتتى. ءۇيىمىز كانالدىڭ جانىندا تۇرعاننان، سۋ اسىپ ءتۇستى. قيراعان جوق. بىراق ەندى مۇندا تۇرۋ قيىن. ءۇي ورنىنا ءۇي بەرەتىن بولدى. وسى اۋىلدان ساتىپ الۋعا، نە سالۋعا قاراجات بولىنەتىن بولدى. تاڭداۋ — وزىمىزدەن. العىستان باسقا ايتارىم جوق، — دەدى زاڭعار اۋىلىنىڭ تۇرعىنى ءجانالى مىرزابەكوۆ.
— جان-جاقتان سۋ كەلدى. ۇيدەن شىعىپ ۇلگەردىك. ءبىرىنشى كۇننەن بەرى كەلىپ، كومەك بەرىپ جاتىر، بىزگە. بەسىنشى كۇن بولدى مىنە، ازاماتتار كۇندە وسى جەردە ءجۇر. اكىمدىكتەن كەلىپ جاتىر. ءبارى وسى جەردە ءجۇر. ءبىزدىڭ اۋىلدا ءۇي اۋلالارىنا عانا زاقىم كەلدى. شۇكىر. ەموتسياعا بەرىلىپ، كەيبىرەۋلەر ورىنسىز سوزدەر ايتقان دا بولار. ءوزىمىز ريزامىز. كوپ راقمەت ايتامىز بارىنە، — دەيدى ساراپحانا اۋىلدىق وكرۋگىنىڭ تۇرعىنى ايشا كەنەنباەۆا.
ءبىر اپتا بۇرىن تۇركىستان وبلىسىنىڭ قازىعۇرت، سارىاعاش اۋداندارىندا جاۋىن-شاشىن مولشەردەن ارتىق جاۋىپ، كەنتاۋ قالاسىندا قاتتى جەل سوعىپ، تابيعي اپات بولدى. قازىعۇرت اۋدانىنىڭ 7 اۋىل وكرۋگىنىڭ (ساراپحانا، قاقپاق، قاراباۋ، قىزىلقيا، شاناق، التىنتوبە، تۇربات), 11 ەلدى مەكەنىندە ۇيلەر مەن قورا-قوپسىلارعا سۋ كىرگەن.
قۇتقارۋ جۇمىستارىنا وبلىستىق توتەنشە جاعدايلار دەپارتامەنتىنىڭ جانە جەرگىلىكتى اتقارۋشى ورگانداردىڭ 100-دەن اسا قىزمەتكەرى جۇمىلدىرىلدى. ولار 15 بىرلىك تەحنيكا، 13 موتوپومپا كۇشتەرىمەن سۋدى سورۋ جانە ارىقتاردى تازالاۋ جۇمىستارىن جۇرگىزدى. اۋداندا جۇمىسشى توپتار قۇرىلدى. اۋدان اكىمدىگىنىڭ ۇيىمداستىرۋىمەن جاستاردان قۇرىلعان ەرىكتىلەر توپتارى زارداپ شەككەن تۇرعىندارعا كومەك بەرۋدە.
جالپى سۋ تاسقىنىنان قازىعۇرت اۋدانىنداعى 11 ەلدى مەكەندە 41 ءۇيدى سۋ باسىپ، 1 ءۇي قۇلاعان.
71 قورا-قوپسىنى سۋ باسىپ، 27-ءسى قۇلاسا، 1 كوممەرتسيالىق نىساندى سۋ باسقان. اۋدان بويىنشا 468 ۋاق مال، 5 ءىرى قارا، 2 جىلقى، 17 تاۋىق شىعىنى بولعان. 50 بال ارا جانۇياسى اعىپ كەتكەن.
تۇركىستان وبلىسى اكىمىنىڭ ءباسپاسوز قىزمەتى
