شىمكەنت قالاسى اكىمىنىڭ اپتا سايىنعى اۋدان بەلسەندىلەرىمەن كەزدەسۋلەرى جالعاسۋدا. بۇگىن مۇرات ايتەنوۆ اۋماعىندا 34 ەلدى مەكەنى بار اباي اۋدانى بەلسەندى تۇرعىندارىمەن كەزدەستى.
«اشىق ديالوگ» فورماتىندا وتكەن باسقوسۋعا، ءماسليحات دەپۋتاتتارى، قوعامدىق كەڭەس مۇشەلەرى، باسقارما باسشىلارى جانە اۋدان ماسەلەلەرىمەن جاقىننان تانىس بولۋ ماقساتىندا قالا پروكۋرورى عابيت مۇقانوۆ پەن پوليتسيا دەپارتامەنتىنىڭ باسشىسى قايرات دالبەكوۆ تە قاتىستى.
جيىندا اۋدانداعى وزەكتى ماسەلەلەردىڭ شەشىم جولدارى تالقىلاندى.
جىل باسىنان بەرى حاتتامالىق سيپات العان 110 ماسەلەنىڭ ورىندالۋ بارىسىن اۋدان اكىمى ب.پارمانوۆ باياندادى. تۇرعىندار كوتەرگەن 41 ماسەلە ءوز شەشىمىن تاپقان، 58 جۇمىس بارىسىندا، 11 تاپسىرما ۇزاق مەرزىمدى، 2025 جىلعا دەيىن جۇزەگە اسىرىلادى.
تۇرعىنداردىڭ ۇسىنىسى بويىنشا «التىنتوبە» تۇرعىن الابىنداعى جامالوۆ پەن نۇرلىبايۇلى كوشەلەرىنە اسفالت توسەلدى. ەلدى مەكەندەگى وتەباي كوشەسىن اسفالتتاۋ بويىنشا مەردىگەر مەكەمە انىقتالۋدا. 2023 جىلى ورازباي كوشەسى، 2024 جىلى ساتقانباەۆ، ىرسىمبەتوۆ جانە جاستار كوشەسى اسفالتتانادى.
«قىزىلجار» شاعىناۋدانىنان جاڭا اۋەجاي تەرمينالعا دەيىن 9,1 كم كارىز جۇيەسىنىڭ قۇرىلىس جۇمىستارى مەردىگەر مەكەمە «BI Global» جشس تاراپىنان جۇرگىزىلدى. بۇگىنگى تاڭدا، مەملەكەتتىك اكت، قابىلداۋ قۇجاتتارى ازىرلەنۋدە.
«اقجار» تۇرعىن الابىن ساپالى ينتەرنەتپەن قامتۋ ماقساتىندا ءموبيلدى وپەراتورلارمەن بازالىق ستانتسياسى ورناتۋ كەلىسىلدى. قازىر بەكىتىلگەن جەر تەلىمىن انىقتاپ زاڭداستىرۋ جۇمىستارى جۇرگىزىلۋدە.
"بۇل جيىندار ءوز ناتيجەسىن بەرۋدە. شەشىمىن تاپقان ماسەلە كوپ دەسەك، شەشىم كۇتكەنى ودان دا كوپ. ەڭ باستىسى، ماسەلەگە ات ءۇستى قاراماي، تۇبەگەيلى زەردەلەپ، جان-جاقتى باعالاپ بارىپ، ساپالى تۇردە ارەكەت جاساۋىمىز كەرەك. سوندا عانا ول ماسەلە بولاشاقتا قايتالانبايتىن بولادى"-دەگەن شاحار باسشىسى جيىن سوڭىندا قاتىسۋشىلارعا ساتتىلىك تىلەپ، العىسىن ءبىلدىردى.
