الەۋمەتتىك جەلىدە ءماجىلىس دەپۋتاتى ءمادي ەلۋباەۆ سىنعا قالدى. جەلى قولدانۋشىلارى ەلۋباەۆ 18 جىل بويى اكەسى نەگىزىن قالاعان ءبىر ۋنيۆەرسيتەتتە ىستەگەنىن، وقۋ ورنىنا تۇسكەننەن كەيىن ساباق بەرە باستاعانىن جازعان. دەپۋتات ونى سىناعاندارعا جاۋاپ بەردى، دەپ حابارلايدى "ادىرنا" ۇلتتىق پورتالى "Tengrinews.kz"-كە سىلتەمە جاساپ.
جەلىدە ەلۋباەۆتىڭ بيوگرافياسى تاراعان. قۇجات بويىنشا ءمادي ەلۋباەۆ 2003 جىلى مىرزاحمەتوۆ اتىنداعى كوكشەتاۋ ۋنيۆەرسيتەتىنە وقۋعا تۇسكەن، ارتىنشا سول جىلى ساباق بەرە باستاعان. كەيىننەن 18 جىل بويى قىزمەتى كوتەرىلگەن: دوتسەنت، پروفەسسور، دەكان، پرورەكتور بولىپ، 2021 جىلى ۋنيۆەرسيتەت رەكتورى اتانعان.
ۋنيۆەرسيتەت نەگىزىن دەپۋتاتتىڭ اكەسى ساعىنتاي ەلۋباەۆ قالاعان كورىنەدى. دەپۋتات ونى سىناعاندارعا جاۋاپ بەرىپ، ول بىرنەشە ۋنيۆەرسيتەتتە جوعارى ءبىلىم العانىن ايتىپ، 2003 جىلى "ەكونوميكا جانە مەنەدجمەنت" ماماندىعى بويىنشا جوعارى ءبىلىمى بولعانىن، سوندىقتان ساباق بەرە باستاعانىن ايتتى.
"العاش جوعارى ءبىلىمدى ءۋاليحانوۆ اتىنداعى كوكشەتاۋ ۋنيۆەرسيتەتىندە ەكونوميكا ماماندىعى بويىنشا الدىم. بەس جىل وقىدىم. مىرزاحمەتوۆ اتىنداعى ۋنيۆەرسيتەتتە ءارتۇرلى ماماندىقتارعا ەكونوميكا نەگىزەرى بويىنشا ساباق بەردىم. ۋنيۆەرسيتەتكە قۇقىقتانۋ ماماندىعىنا ءتۇستىم", - دەيدى ەلۋباەۆ.
دەپۋتاتتىڭ سوزىنشە، ءۇش جوعارى ءبىلىمى بار: ءبىرىنشى - ءۋاليحانوۆ اتىنداعى ۋنيۆەرسيتەتتە ەكونوميكا بويىنشا (2003); ەكىنشىسى - مىرزاحمەتوۆ ۋنيۆەرسيتەتىندەگى يۋريسپرۋدەنتسيا بويىنشا (2005);
ءۇشىنشى - ءۋاليحانوۆ اتىنداعى ۋنيۆەرسيتەتتە قۇرىلىس بويىنشا (2010);
سونىمەن قاتار، دەپۋتات "دوتسەنت" جانە "پروفەسسور" اتاعىنا قاتىستى تۇسىنىك بەردى.
"مەن راسىندا، مىرزاحمەتوۆ اتىنداعى ۋنيۆەرسيتەت پروفەسسورىمىن. بۇل بارلىق ۋنيۆەرسيتەتتەگى جالپى تاجىريبە. اتاق پەن دارەجەنى شاتاستىرماۋ ماڭىزدى. كانديداتتىق، دوكتورلىق دارەجەنى قورعاۋ كەرەك. بۇل عىلىمي دارەجەلەر، ولار بويىنشا ديسسەرتاتسيالىق جۇمىستار جازىلادى، سودان كەيىن قورعاۋ جۇرگىزىلەدى. اتاق ۋنيۆەرسيتەت ىشىندە اتقارىلعان جۇمىستار مەن ەڭبەكتەر نەگىزىندە بەرىلەدى. مەندە ۋنيۆەرسيتەت اتاعى بولدى. ۋنيۆەرسيتەتتەر ولاردى ءوز ەڭبەكتەرىن جازاتىن عالىمدارىنا بەرۋگە قۇقىلى. بۇل، سونىمەن قاتار، ۋنيۆەرسيتەت رەيتينگى ءۇشىن قاجەت. ەگەر عالىم بەلسەندى بولسا، ەڭبەكتەر جازادى، مونوگرافيالار شىعارادى، ىنتالاندىرۋ رەتىندە اتاق تا بەرىلەدى", - دەدى ءمادي ەلۋباەۆ.
سونىمەن قاتار، 2011 جىلى ەلۋباەۆ زاڭ عىلىمدارىنىڭ دوكتورى اتاعىن قورعاعان.
ايتا كەتەيىك، ءمادي ەلۋباەۆ 1982 جىلى تۋعان. 2014 جىلى 32 جاسىندا ۋنيۆەرسيتەت رەكتورى اتاندى. 2021 جىلى Amanat پارتياسى اتىنان ءماجىلىس دەپۋتاتى بولىپ سايلاندى.
"ادىرنا" ۇلتتىق پورتالى.
