نازارباەۆ داۋىرىندە ءتۇرلى مينيسترلىكتەردى باسقارعان ەكس-شەنەۋنىك، بەلگىلى ەكونوميست جاقسىبەك قۇلەكەەۆ «سۇراۋى بار» YouTube ارناسىنا بەرگەن سۇحباتىندا نازارباەۆ وتباسىنىڭ قالاي بيزنەس جاساعانى جانە ونىڭ ەل ەكونوميكاسىنا كەلتىرگەن زيانى جايىندا ايتتى.
«مىسالى ءسىز ينۆەستور رەتىندە شەتەلدەن ۇلكەن قوندىرعى الىپ كەلىپ ۇلكەن زاۋىت اشقىڭىز كەلەدى. ءدال سونداي زاۋىتتى «سەميانىڭ» مۇشەلەرى دە سالعىسى كەلەدى. ءسىز قوندىرعىنى شەتەلدەن الىپ كەلگەنگە وتە كوپ سالىق تولەيسىز، ال ولار سالىق تولەمەيدى. سوسىن ءوندىرىستى باستاعاننان كەيىن ءبىرىنشى كۇننەن باستاپ ءسىزدىڭ ارتىڭىزدا سالىق ينسپەكتورلارى جۇرەدى، جانىڭىزدى قويماي بارلىق ءتيىستى سالىقتى تولەتەدى. ال جاڭاعى زاتتاردى ارزانعا الىپ كەلگەن، شيكىزاتتىڭ بارلىعىن ارزانعا الىپ كەلىپ جاتقان بەدەلدى توپتىڭ وكىلدەرى سالىقتىڭ ەشقايسىسىن تولەمەيدى. سوندا ءسىز بيزنەسىڭىزدى قالاي دامىتاسىز؟ انانىڭ شىعارىپ وتىرعان زاتى سىزدەن ەكى ەسە ارزان بولادى. ەكەۋىڭىز نارىققا بارعان كەزدە ءسىز جۇمىس ىستەي المايسىز»، - دەدى جاقسىبەك قۇلەكەەۆ.ءوز كەزەگىندە بۇنداي ادىلەتسىزدىك نۇرسۇلتان نازارباەۆ ءوزى سىناعان ماسىلدىققا الىپ كەلدى دەيدى ەكونوميست.
«وتباسىنىڭ (نازارباەۆ وتباسى) جاساپ وتىرعان نارسەسى ءبىزدىڭ قوعامدا باسەكەلەستىكتىڭ دامۋىنا، كاسىپكەرلىكتىڭ دامۋىنا وتە ۇلكەن زيان تيگىزگەن زات. ءبىز زاڭدى تۇردە وتباسىن، ەلباسىنىڭ اينالاسىنداعى وتباسى مۇشەلەرىنىڭ بارلىعىن زاڭنان جوعارى قويدىق. ولار زاڭعا باعىنعان جوق. ونىڭ بارلىعىن زاڭداستىرىپ قويدىق ءبىز. ولار ايتادى: «مەن ادام ولتىرسەم دە سوتتالمايمىن»، - دەپ. سونىڭ بەر جاعىندا سالىق تولەمەۋ دەگەن نە؟ ولار زاڭنان جوعارى بولعاننان كەيىن ادىلەتتى قوعام بولۋى مۇمكىن ەمەس»، - دەپ پىكىر ءبىلدىردى ول.سۇحباتتىڭ تولىق نۇسقاسىن تومەندەگى سىلتەمەدەن كورۋگە بولادى: https://youtu.be/AU55Tl3kvbc
