تالدىقورعان قالاسىندا «جاستاردى الەۋمەتتەندىرۋ جانە وڭالتۋ» جوباسى اياسىندا NEET ساناتىنداعى جاستاردى ەلىمىزدىڭ الەۋمەتتىك-ەكونوميكالىق ومىرىنە تارتۋ ماسەلەلەرى بويىنشا كونفەرەنتسيا ءوتتى، دەپ حابارلايدى "ادىرنا" ۇلتتىق پورتالى.
قر اقپارات جانە قوعامدىق دامۋ مينيسترلىگى مەن ازاماتتىق باستامالاردى قولداۋ ورتالىعىنىڭ قولداۋىمەن «ادىرنا» ۇەب» قق «جاستاردى الەۋمەتتەندىرۋ جانە وڭالتۋ» جوباسى اياسىندا NEET ساناتىنداعى جاستاردى ەلىمىزدىڭ الەۋمەتتىك-ەكونوميكالىق ومىرىنە تارتۋ ماسەلەلەرى بويىنشا 2022 جىلدىڭ 17 مامىر كۇنى تالدىقورعان پوليتەحنيكالىق كوللەدجىندە «NEET» جاستارىنىڭ قۇندىلىعى» اتتى كەزدەسۋ ءوتتى.
جوبا جاستاردىڭ جۇمىس جانە وقۋعا كەلگەندە بەلسەندىلىك تانىتپاۋ سەبەپتەرى، جوبالىق كەڭسە تاراپىنان جاستارعا كومەك بەرۋ جانە كاسىبي باعدارلاۋ تۇرلەرى، NEET جاستارىنىڭ قوردالانعان ماسەلەلەرىنىڭ شەشۋ جولدارىن قاراستىرۋعا باعىتتالعان.
ءىس-شارا جاستاردى بولاشاق ومىرلىك جوسپارلارىنا ىنتالاندىرۋ جانە شىعارماشىلىق الەۋەتتى دامىتۋ باعىتىندا ىسكە اسىرىلدى.
كەزدەسۋ قوناعى كاسىپكەر ەلبول ەستايۇلى مانساپ جانە جەكە ءوسۋ ءۇشىن ومىرلىك داعدىلاردى دامىتۋداعى تاجىريبەلەرىمەن ءبولىسىپ، شارا بارىسىندا جاستاردىڭ كاسىپ اشۋ، الەۋمەتتىك ماسەلەلەرگە قاتىستى سۇراقتارىنا جاۋاپ بەردى.
جوبا ۇيىمداستىرۋشىسى "ادىرنا" ۇەب پرەزيدەنتى ارمان اۋباكىر:
"NEET ساناتىنداعى جاستارعا، ۇزاق مەرزىمدى جۇمىسسىز جۇرگەن جاستار، ۇزاق ۋاقىت بويى جۇمىسسىزداردىڭ نەگىزگى ۇلەسىن قۇرايتىن، وتباسىلىق مىندەتتەردى ورىنداۋعا بايلانىستى ەكونوميكالىق بەلسەندى ەمەس جاستار جانە دە قىسقا مەرزىمدى جۇمىسسىزدار جاتادى. بۇل جوبا ەلدەگى جاستاردىڭ الەۋمەتتىك ماسەلەلەرىن شەشۋگە مۇرىندىق بولىپ، اتالمىش پروبلەمالاردى اۋىزدىقتاۋعا بىردەن-ءبىر سەبەپ بولىپ وتىر. ماسەلەن وسى سىندى جوبالاردىڭ ارقاسىندا 10 جىلدا ەلدەگى NEET ساناتىنداعى جاستار ۇلەسىنىڭ كورسەتكىشى 8,2% - دان 7,1% - عا دەيىن 1,1% ازايىپ وتىر" دەدى.
سونداي-اق، كەزدەسۋ بارىسىندا بۇگىنگى كۇنى ەڭبەك نارىعىنداعى قاجەتتى ماماندىقتار جانە قاي سالانى بەلسەندى دامىتۋ كەرەك، جاستاردى كاسىپكەرلىك قىزمەتكە وقىتۋ، كاسىپكەردىڭ قاجەتتى داعدىلارى، جاستارعا بەرىلگەن مۇمكىندىك پەن سونى قالاي دۇرىس پايدالانۋ كەرەكتىگى جايىندا ءسوز قوزعالدى.
كەزدەسۋ سپيكەرى كاسىپكەر ەلبول ەستايۇلى جوبا جايىندا:
ء"بىز سىندى كاسىپكەرلەر جاس بۋىنعا ۇلگى كورسەتىپ، باعىت-باعدار بەرىپ وتىرعانى دۇرىس. سەبەبى، ەلدىڭ ەكونوميكاسى، ەلدىڭ الەۋەتى دامۋ ءۇشىن بيزنەس سالاسىنىڭ الار ورنى ۇلكەن. وسى سالانىڭ دامۋى مەن جەتىلۋى تىكەلەي جاستارعا بايلانىستى. جاستارمەن جۇمىس جاساۋ، جۇمىسسىزدىقپەن كۇرەسۋ جانە جاس بۋىنعا قاجەتتى ءبىلىم بەرۋدى جۇزەگە اسىرۋعا كومەك بەرەتىن وسىنداي جوبالاردىڭ قوعام ءۇشىن ماڭىزى زور" دەپ پىكىر ءبىلدىردى.
"ادىرنا" ۇلتتىق پورتالى
