قر ەنەرگەتيكا مينيسترلىگى نوۆوروسسيسكىدەگى كتك ايلاعىندا جاسالعان شابۋىلعا قاتىستى رەسمي تۇسىنىكتەمە بەردى، دەپ حابارلايدى "ادىرنا" ۇلتتىق پورتالى.
ۆەدومستۆو مالىمەتىنشە، 29 قاراشا كۇنى نوۆوروسسيسكىدەگى پورت ماڭىندا كقك-نىڭ تەڭىز ينفراقۇرىلىمى وبەكتىلەرىنە ەكيپاجسىز ءجۇزۋ قۇرالدارى ارقىلى شابۋىل جاسالعان. سونىڭ سالدارىنان ۆپۋ-2 سىرتقى ايلاقتىق قۇرىلعىسى قاتتى زاقىمدانىپ، اگرەگات تولىق كولەمدە جوندەۋ-قالپىنا كەلتىرۋ جۇمىستارى جۇرگىزىلگەنگە دەيىن ىستەن شىعارىلدى.
ەنەرگەتيكا مينيسترلىگى مۇنداي ارەكەتتەردىڭ ازاماتتىق ماقساتتاعى سىندارلى ينفراقۇرىلىم نىساندارىنا قارسى جاسالۋى جول بەرۋگە بولمايتىنىن اتاپ ءوتتى.
«كقك قۇبىر جۇيەسى – حالىقارالىق ەنەرگەتيكالىق جوبا. ونىڭ وبەكتىلەرىنە كەز كەلگەن كۇشتىك ىقپال ەتۋ جاھاندىق ەنەرگەتيكالىق قاۋىپسىزدىككە تىكەلەي قاتەر توندىرەدى ءارى كونسورتسيۋم قاتىسۋشىلارىنىڭ، سونىڭ ىشىندە قازاقستان رەسپۋبليكاسىنىڭ ەكونوميكالىق مۇددەلەرىنە ەلەۋلى زيان كەلتىرەدى»، – دەلىنگەن مينيسترلىك مالىمدەمەسىندە.
تەرىس سالداردى بارىنشا ازايتۋ جانە ءىرى كەن ورىندارىنداعى مۇناي ءوندىرۋ كولەمىن ساقتاۋ ماقساتىندا مينيسترلىك تاراپىنان ەكسپورتتىق مۇناي كولەمدەرىن بالامالى باعىتتارعا شۇعىل قايتا باعىتتاۋ جوسپارى ىسكە قوسىلعانىن اتاپ ءوتتى.
قر ەنەرگەتيكا مينيسترلىگىنىڭ حابارلاۋىنشا، جاعداي ۇكىمەتتىڭ ەرەكشە باقىلاۋىندا تۇر.
