اتىراۋ وبلىسى يساتاي اۋدانى يساتاي اۋىلىندا 8-سىنىپ وقۋشىسىن جوعارى سىنىپتىڭ ۇلدارى اياۋسىز سوققىعا جىققان. سونىڭ سالدارىنان ءجاسوسپىرىم ءتۇرلى دەنە جاراقاتىمەن اۋداندىق اۋرۋحاناعا جەتكىزىلدى، دەپ حابارلايدى «ادىرنا» ءتىلشىسى «اق جايىق» باسىلىمىنا سىلتەمە جاساپ.
ءجاسوسپىرىمنىڭ اناسى گۇلزادا مۋساعاليۆانىڭ ايتۋىنشا، وقيعا 20 مامىر كۇنى كۇندىز بولعان. فۋتبول ويناۋعا كەتكەن ەكەن بالاسى ۇيىنە سوققىعا جىعىلىپ كەلگەن.
«وتباسىمىزدا ءۇش بالامىز بار. كەنجە بالام مۇحانبەت فۋتبولدان ءبىرتۇرلى دەنەسىن اۋىرسىنىپ كەلگەندەي بولدى. نە بولدى دەپ سۇراعانىمدا ويناپ ءجۇرىپ، قۇلاپ قالدىم دەدى. سودان سوڭ جاتىپ قالدى. كەيىن تاماققا تۇرعىزعانىمىزدا ورىندىقتا دۇرىس وتىرا المادى، ءبىرتۇرلى دىرىلدەپ وتىرعانداي ەدى. ەرتەسىنە دە بالام سەلسوق، جاتا بەردى. سول كەزدە ۇستىندەگى كوگەرگەن ىزدەردى كورىپ شوشىپ كەتتىم. دەرەۋ «جەدەل جاردەم» مەن پوليتسيانى شاقىرىپ، ارىز ءتۇسىردىم»، - دەيدى گ. مۋساعاليەۆا.
دارىگەرلەر ءجاسوسپىرىمدى اۋداننان وبلىس ورتالىعىنا الىپ كەتكەن. سول جەردە وعان «وڭ جاق يىقتىڭ كوپتەگەن جۇمساق تىندەرىنىڭ كوگەرۋى، بەل جانە جۇرەك قۋىسىنىڭ جاراقاتى» دەگەن دياگنوز قويعان.
«بالاما بۇعان دەيىن دە الىمجەتتىك جاسالعان ەدى. بىردە 9-سىنىپ وقۋشىلارى مەكتەپتىڭ كيىم شەشەتىن جەرىنىڭ ەسىگىن سىندىرىپ تاستاپ، «سەن سىندىردىم دەپ ايتاسىڭ» دەپ قورقىتقان. بالام مەكتەپ ديرەكتورىنا تۇسىنىكتەمە جازعان. بىراق مەكتەپ ۇجىمى مۇنىڭ بىرەۋىن ماعان ايتقان جوق، مەن بىرەۋلەردەن ەستىپ بارىپ، اق-قاراسىن شەشۋدى سۇرادىم. بۇعان بىراق مەكتەپ اكىمشىلىگى بەي-جاي قاراپ، جاۋاپسىز قالدىردى. اينالىپ كەلگەندە جاعداي ۋشىعىپ، وسىعان دەيىن جەتىپ وتىر. مەكتەپتىڭ پسيحولوگى نە قاراپ وتىر، شاراسىن الىپ، تۇسىندىرمە جۇمىستارىن جۇرگىزبەي مە؟ نەگىزى بالامدى 9 بالا ۇرىپ-سوققان. ەكەۋى 9-سىنىپ وقۋشىلارى، قالعانى – سىنىپتاستارى. دوستارىن قورقىتىپ، بالامدى ءبارى جابىلىپ ۇرۋعا ماجبۇرلەگەن. بۇگىندە بالالاردىڭ اكە-شەشەلەرى كەلىپ كەشىرىم سۇراۋدا. مەن كەشىرەرمىن، بالالاردى سوتتاتىپ نە تابامىن؟ بىراق مۇنىڭ اياقسىز قالۋىن تاعى قالامايمىن. مەكتەپ تە جاۋاپ بەرسىن»، - دەيدى انا.
يساتاي ورتا مەكتەبىنىڭ ديرەكتورى ايگۇل ادىلباەۆا «بۇل ىسپەن پوليتسيا اينالىسۋدا، تەرگەۋ اياقتالمايىنشا مەن ەشتەڭە ايتا المايمىن» دەپ قىسقا قايىردى.
اتىراۋ وبلىستىق پد ءباسپاسوز قىزمەتى مالىمدەگەندەي، 21 مامىردا 2007 جىلى تۋعان ءجاسوسپىرىمنىڭ سوققىعا جىعىلعانى تۋرالى اتا-اناسىنان ارىز تۇسكەن. كۇدىكتى رەتىندە يساتاي ورتا مەكتەبىنىڭ 9-سىنىپ وقيتىن ەكى وقۋشىسى انىقتالدى. قر قك 107- بابى («دەنساۋلىققا قاساقانا ورتاشا اۋىرلىقتاعى زيان كەلتىرۋ») بويىنشا سوتقا دەيىنگى تەرگەۋ امالدارى باستالىپ، ساراپتامالار تاعايىندالعان.
