"يرينا كايراتوۆنا" توبىنىڭ مۇشەسى مەن كوپشىلىك Shiza دەپ تانيتىن اسحات جولشيەۆ الماتىداعى كونتسەرت كەزىندە ساحناعا قازاقستاننىڭ تۋىن الىپ شىعىپ، بەيادەپ قىلىق كورسەتكەن، دەپ حابارلايدى «ادىرنا» ۇلتتىق پورتالى Stan.kz –كە سىلتەمە جاساپ.
25 مامىردا الماتىداعى بالۋان شولاق اتىنداعى سپورت سارايىندا وتكەن كونتسەرتتىڭ ارتى داۋعا ۇلاستى. وندا Shiza كوك تۋدى قولىنا وراپ الىپ، بالاعات سوزدەرىن قولدانعان. ال "يرينا كايراتوۆنا" توبىنىڭ مۇشەسى ازامات ماركلەنوۆ بەلگىسىز سەبەپپەن كۇلىپ، ونى قولداعانداي قىلىق كورسەتكەن.
حالىق ەكى ءانشىنى قاتاڭ سىنعا الدى.
"ساحنادان ماڭگى الاستاتىپ جىبەرۋ كەرەك بۇلاردى. سوسىن تىنىشتالادى", ء"وزىن سىيلايتىن ءاربىر ادام مۇنداي كونتسەرتتەرگە بارماۋ كەرەك", - دەپ جازدى جەلى قولدانۋشىلارى.
سونداي-اق، ونەر جۇلدىزدارى اتالعان ەكى ءانشىنى جازالاۋدى تالاپ ەتتى.
"كيەلى كوك تۋىمىزدى مىنا قاسيەتسىز ۋقالاپ، قول ورامال قىلدى- اۋ. اياققا تاپتاپ... گەنادي گولوۆكين - ۇلتى وزگە بولسا دا، رينگتە ۇلتتىق شاپان كيىپ، كوك تۋىمىزدى جەلبىرەتىپ، تالاي كوزىمىزگە جاس كەلتىرىپ، جۇرەگىمىزدى تەبىرەنتىپ ەدى! كوك تۋ- مەملەكەتتىك ءرامىز! ونى قورلاۋعا جول جوق! مىنا ماقۇلىق (اسپانداعى جۇلدىز بولسا دا) جاۋاپقا تارتىلۋى كەرەك! ۆيدەومەن كەشىرىم سۇراعاندار كەشىرىلمەسىن! زاڭ بويىنشا جازالانسىن!" - دەيدى مەرۋەرت تۇسىپباەۆا.
اشۋعا مىنگەن نۇرلان البان بولسا Shiza-نى اياۋسىز سىنعا الىپ، ونى “حايۋانعا” تەڭەدى.
"مەنىڭ ميىما قان قۇيىلايىن دەپ وتىر. قازاقتىڭ جىگىتتەرى دەپ ايتادى. قازاق بولماي كەت سەن. اتساڭ اتىپ جىبەر! قانشا جۇلدىز بولساڭ دا، اسپاننان اياعىڭ سالبىراپ تۇسسە دە، سەن ادام ەمەس ەكەنسىڭ. حايۋان ەكەنسىڭ. ولاردىڭ ايتقانىن ايتۋعا اۋزىم بارمايدى. ءبىز بالا تاربيەلەپ وتىرىپ، سول بالانى قايتسەك قازاقىلاندىرامىز، قايتسەك ۇلتتىق رۋحتى سىڭىرەمىز، قايتسەك سولاردىڭ تاربيەسىمەن اينالىسامىز دەپ جاتقاندا، ولاردىڭ كورسەتىپ وتىرعان تاربيەسى، ۇلگىسى مىناۋ ما؟" - دەپ اشۋلاندى نۇرلان البان.
ول اتالعان ەكى ءانشىنى جازالاۋدى تالاپ ەتتى.
“قۇزىرلى ورگانداردان، جوعارى شەندى شەنەۋنىكتەردەن، مينيسترلىكتەن مىناعان توقتاۋ سالاتىن ادام بار ما؟ مىنالاردىڭ قۇيرىعىن كەسىپ قۇنتيتىپ، قۇلاعىن كەسىپ، ورتادان الاستاۋ كەرەك. ءتىپتى، قولىنا ميكروفون بەرمەي، ساحناعا جولاتپايتىنداي جاساۋ كەرەك. مىناعان نە دەيسىز، اعايىن؟ جاۋاپ بەرەتىن بىرەۋ بار ما؟" – دەدى البان.
«ادىرنا» ۇلتتىق پورتالى
