الەۋمەتتىك جەلىدە قازاقستاننىڭ بۇرىنعى مادەنيەت جانە سپورت ءمينيسترى ارىستانبەك مۇحامەديۇلى قاماۋعا الىندى دەگەن اقپارات تاراعان بولاتىن. الايدا سىبايلاس جەمقورلىققا قارسى اگەنتتىكتىڭ ءباسپاسوز قىزمەتى ازىرگە بۇل اقپاراتتى راستامادى، دەپ حابارلايدى «ادىرنا» ۇلتتىق پورتالى.
«ازىرگە مۇنداي اقپارات جوق. ەگەر رەسمي جاڭالىق بولسا، پاراقشالارىمىز ارقىلى حابارلايمىز»، - دەدى اگەنتتىكتىڭ ءباسپاسوز قىزمەتى.
جەلىدە بەيسەنبى كۇنى مۇحامەديۇلى اۋرۋحانادان شىعىپ، ۇيىنە جەتكەن كەزدە انتيكور قىزمەتكەرلەرى بىردەن تەرگەۋگە الىپ كەتكەنى جازىلعان. بۇل تۋرالى نۇر-سۇلتان قالالىق سوتىنىڭ ءباسپاسوز حاتشىسى بوتاگوز بايانوۆا ارىستانبەك مۇحامەديۇلىنا قاتىستى مامانداندىرىلعان تەرگەۋ سوتىنا ماتەريال تۇسپەگەنىن ايتتى.
ايتا كەتەيىك، ارىستان مۇحامەديۇلى ۇلتتىق مۋزەيدىڭ "التىن ادامنىڭ الەم مۋزەيلەرىنە شەرۋى" حالىقارالىق كورمەسىن وتكىزۋ بويىنشا قارجى جىمقىردى دەگەن كۇدىككە ىلىنگەن.
"ادىرنا" ۇلتتىق پورتالى
