سەنات دەپۋتاتى نۇرتورە ءجۇسىپ جاقىندا "يرينا قايراتوۆنا" توبىمەن بولعان جانجالعا قاتىستى پىكىر ءبىلدىردى. سەناتور قازاقستاندا مەملەكەتتىك رامىزدەردى قورلاعانى ءۇشىن جازانى قاتايتىپ، ونەر ادامدارىنىڭ رەپەرتۋارىنا تسەنزۋرا قويۋ كەرەك دەپ سانايدى، دەپ حابارلايدى "ادىرنا" ۇلتتىق پورتالى.
"orda.kz" سايتىنىڭ جازۋىنشا، سەناتور ادەپسىز سوزدەر ايتىپ، جۇرتشىلىقتى سىيلاماعان، ەسىرتكى مەن ىشىمدىك ىشكەن انشىلەردى بەس جىلعا دەيىن ساحناعا شىعارماۋدى ۇسىندى.
— مادەنيەت مينيسترلىگى جانىنان رەپەرتۋار القاسى مەن رەسپۋبليكالىق، وبلىستىق كوركەمدىك كەڭەستەر قۇرۋ كەرەك. بۇقارالىق مادەني شارالاردى وتكىزۋ تالابىنا حالىقتىڭ سالت-ءداستۇرى مەن ادەت-عۇرپىن ساقتاۋ جانە قۇرمەتتەۋ ەرەجەلەرىن ەنگىزۋدى، وسى تالاپتاردى بۇزعان شىعارماشىلىق ۇيىمداردىڭ قىزمەتىن بەس جىلعا شەكتەۋدى تالاپ ەتەمىز. دەپۋتاتتىق ساۋالعا جازباشا جاۋاپ بەرۋىڭىزدى سۇرايمىز، - دەدى نۇرتورە ءجۇسىپ پرەمەر-مينيستر ءاليحان سمايىلوۆقا ءوتىنىش ءبىلدىرىپ.
سونداي-اق، ول "مادەنيەت تۋرالى" زاڭعا جەكەلەگەن شىعارماشىلىق وكىلدەرىنىڭ مادەني-كوپشىلىك شارالارىن ۇيىمداستىرۋشىنىڭ حالىق الدىنداعى جاۋاپكەرشىلىگىن قامتاماسىز ەتەتىن باپتاردى ەنگىزۋدى ۇسىندى.
ەسكە سالا كەتەيىك، تۋدى قورلاعان مۋزىكانتتار وزدەرىنىڭ قىلىقتارى ءۇشىن كەشىرىم سۇراپ، ايىپپۇل تولەگەن بولاتىن.
