كيريلل كەكەر «قايرات» فۋتبول كومانداسىنىڭ باس باپكەرى بولىپ تاعايىندالدى. بۇل تۋرالى كلۋبتىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
كلۋبتىڭ ءباسپاسوز قىزمەتىنىڭ مالىمەتىنشە ، كيريلل كەكەر – جاس ويىنشىلارمەن جۇمىس ىستەۋدە مول تاجىريبەگە يە «قايرات» فك اكادەمياسىنىڭ ەڭ تابىستى ماماندارىنىڭ ءبىرى.
2017 جىلعى ماۋسىمدا كەكەر شاكىرتتەرى 2002 جىلى دۇنيەگە كەلگەن بالالار اراسىنداعى قر بىرىنشىلىگىندە وزدەرىنەن ءبىر جاسقا ۇلكەن قارسىلاستارمەن باقتالاسسا دا، التىن جۇلدەگە قول جەتكىزدى.
نۇرلان قاپپاروۆتى ەسكە الۋعا ارنالعان تۋرنيردە جەڭىمپاز، ۆالەنسياداعى حالىقارالىق سايىستا كۇمىس مەدال يەگەرى جانە سەرگەي كۆوچكين اتىنداعى جارىستا كۋبوك ەنشىلەدى. 2019-دان 2020 جىلعا دەيىنگى ماۋسىمدا كيريلل سەرگەەۆيچ «سارى-قارالاردىڭ» نەگىزگى كومانداسىندا باس باپكەردىڭ كومەكشىسى قىزمەتىندە بولىپ، بىرىنشىلىكتىڭ التىنىن جەڭىپ الدى. 2021 جىلعى ماۋسىمدى كيريل كەكەر «قايرات جاستاردىڭ» باس باپكەرى ستاتۋسىندا باستاپ، ماۋسىم ايىندا «قايرات» فك باس جاتتىقتىرۋشى قىزمەتىن اتقارۋشى اتاندى.
2022 جىلدىڭ قاڭتارىندا كەكەر «قايرات ماسكەۋ» فك باس جاتتىقتىرۋشىسى رەتىندە تانىستىرىلدى. ونىڭ ەڭبەگى ارقاسىندا، «ماسكەۋلىكتەر» ۇفل-2 تۋرنيرلىك كەستەسىندە چەمپيونات اياقتالۋىنا ءبىر تۋر قالعاندا، 5-ورىندا كەلەدى.
”ادىرنا” ۇلتتىق پورتالى
