«ايمان-شولپان» ليرو-ەپوستىق جىرىن العاش قاعاز بەتىنە ءتۇسىرىپ، 1896 جىلى باسپاعا ۇسىنعان – جۇسىپبەك شايحىسلامۇلى. جىردىڭ جارىق كورگەنىنە بيىل 126 جىل تولىپ وتىر. سونىمەن قاتار مۇحتار اۋەزوۆتىڭ تۋعانىنا – 125 جىل. مۇحتار اۋەزوۆتىڭ «ايمان-شولپان» جىرى نەگىزىندەگى مۋزىكالىق دراماسى 1934 جىلى جازىلدى. 1956 جىلى اۆتور ەكىنشى رەداكتسياسىن جاسادى.
رينات ريفحاتۇلى زايتوۆتىڭ باسشىلىعىنداعى «الاتاۋ» ءداستۇرلى ونەر تەاترىندا 8 ماۋسىم كۇنى اتالمىش تۋىندىنىڭ ەكىنشى نۇسقاسى بويىنشا «ايمان-شولپان» مۋزىكالىق كومەدياسىنىڭ پرەمەراسى ءوتتى. تاريحي جانە كوركەمدىك شىندىقتى قامتىعان مۋزىكالىق كومەديا قازاقتىڭ ۇلتتىق بولمىسىن كەڭىنەن تانىتۋ، جەكە باس بوستاندىق ماسەلەسىن كوتەرۋ، مامان مەن كوتىبار باتىر اراسىنداعى ءوزارا كۇرەس، بەيبىتشىلىك جانە ت.ب. باعىتتالادى. قويىلىمنىڭ جوعارعى مىندەتى بەيبىتشىلىك ەكەنىن اڭعارۋعا بولادى. ويتكەنى ايمان مەن شولپان ادەتتەگىدەي الدىڭعى پلاندا ەمەس. بەلگىلى ءبىر بالانس ساقتالعان. بۇل دا ءبىر رەجيسسەرلىك شەشىم. تۇتاستاي العاندا وزەكتى ارەكەت تە كورىندى. بي قوزعالىستارى ارقىلى نەگىزگى ەموتسيالار اشىلا تۇسسە، انسامبل قويىلىمنىڭ بويىنا قان جۇگىرتكەن. دەكوراتسيا، جارىق، دىبىس جانە ت.ب. ۇيلەسىم تاپقان. تەاتردىڭ باعىتىنا سايكەس، سونداي-اق مۋزىكالىق كومەديا بولعان سوڭ، اريستەردىڭ اكتەرلىك قابىلەتتەرىنەن بولەك ءان ايتۋ ونەرلەرى دە اسا ماڭىزدى. بۇل جاعى دا كوڭىل قۋانتارلىقتاي.
پرەمەرا كورەرمەندەردىڭ ۇزاق قوشەمەتتەرىمەن اياقتالدى.
قۋانىش جۇمابەكۇلى
«الاتاۋ» ءداستۇرلى ونەر تەاترى ادەبيەت ءبولىمىنىڭ مەڭگەرۋشىسى
