تالعار اۋدانى اكىمدىگىنىڭ بۇرىنعى شەنەۋنىكتەرى 2017-2019 جىلدار ارالىعىندا الماتى اۋەجايىنا جاقىن جەرلەردى زاڭسىز يەلىكتەن شىعارعانى جانە ساتقانى ءۇشىن سوتتالدى، دەپ حابارلادى “ادىرنا” ۇلتتىق پورتالى.
تالعار اۋداندىق سوتىنىڭ مالىمەتىنشە، شەنەۋنىكتەرگە 361-باپتىڭ 1-بولىگى (بيلىكتى اسىرا پايدالانۋ), 362-ءبولىمنىڭ 4-بولىگى (بيلىكتى نەمەسە لاۋازىمدى بيلىكتى اسىرا پايدالانۋ) جانە 190-باپتىڭ 4-بولىگى (الاياقتىق) بويىنشا ايىپ تاعىلعان. پروكۋرور ايىپتالۋشىلاردى 2 جىلدان 8 جىلعا دەيىن باس بوستاندىعىنان ايىرۋدى سۇراعان، ال ولار كىناسىن مويىنداماي، وزدەرىن اقتاۋدى سۇراعان.
ناتيجەسىندە سوتتالۋشىلاردىڭ كىناسى ساراپشىلاردىڭ قورىتىندىلارى، قاتىسۋشىلاردىڭ، كۋاگەرلەردىڭ ايعاقتارى، جاسىرىن تەرگەۋ ارەكەتتەرىنىڭ ناتيجەلەرى بويىنشا دالەلدەنگەن.
تالعار اۋدانى پانفيلوۆ اۋىلدىق وكرۋگىنىڭ بۇرىنعى اكىمى ا. «وكىلەتتىگىن اسىرا پايدالانۋ جانە الاياقتىق» باپتارى بويىنشا كىنالى دەپ تانىلىپ، قىلمىستىق-اتقارۋ جۇيەسىنىڭ ورتاشا قاۋىپسىز مەكەمەلەرىندە جازاسىن وتەي وتىرىپ، 8 جىلعا باس بوستاندىعىنان ايىرىلدى.
اۋداننىڭ بۇرىنعى باس ساۋلەتشىسى ر. وكىلەتتىگىن اسىرا پايدالانعانى ءۇشىن كىنالى دەپ تانىلىپ، 6 جىلعا باس بوستاندىعىنان ايىرىلدى، ول قىلمىستىق-اتقارۋ جۇيەسىنىڭ ورتاشا قاۋىپسىز مەكەمەلەرىندە جازاسىن وتەيدى.
قالا اكىمدىگىنىڭ جەر ماسەلەلەرى جونىندەگى باس مامانى وسى قىلمىستارعا قاتىسقانى ءۇشىن كىنالى دەپ تانىلىپ، 5 جىلعا باس بوستاندىعىنان ايىرىلدى.
«جەر قاتىناستارى ءبولىمى» مم باسشىسى ت. 371-باپتىڭ 2-بولىگى «نەمقۇرايلىلىق» بويىنشا كىنالى دەپ تانىلىپ، وعان ەكى جىلعا باس بوستاندىعىن شەكتەۋ جازاسى تاعايىندالدى. الايدا ۇكىمگە الماتى قالاسى مەدەۋ اۋداندىق №2 سوتىنىڭ 2022 جىلعى 18 ناۋرىزداعى ۇكىمى بويىنشا تاعايىندالعان التى جىلعا باس بوستاندىعىنان ايىرۋ جازاسى قوسىلعان. وسىلايشا، وعان التى جىل ءۇش ايعا باس بوستاندىعىنان ايىرۋ جازاسى تاعايىندالدى.
«جەر قاتىناستارى ءبولىمى» مم باسشىسىنىڭ مىندەتىن اتقارۋشى ك. «نەمقۇرايلىلىق» بابى بويىنشا كىنالى دەپ تانىلىپ، ەكى جىلعا باس بوستاندىعىن شەكتەۋ جازاسىنا كەسىلدى، الايدا راقىمشىلىق بويىنشا نەگىزگى جازادان بوساتىلدى.
ۇكىم شىعارۋ كەزىندە جەڭىلدەتەتىن (بالالارىنىڭ بولۋى، زەينەت جاسى), سونداي-اق، اۋىرلاتاتىن ءمان-جاي ەسكەرىلگەن. بارلىق سوتتالۋشى مەملەكەتتىك قىزمەتتە جۇمىس ىستەۋ قۇقىعىنان ايىرىلعان.
ۇكىم ءالى زاڭدى كۇشىنە ەنبەگەن.
ەسكە سالايىق، 2021 جىلعى مامىردا تالعار اۋدانىنىڭ جەرگىلىكتى شەنەۋنىكتەرى مەن ريەلتور 2019 جىلى Bek Air ۇشاعى اپاتقا ۇشىراعان اۋدانداعى، گۇلدالا اۋىلىنداعى جەردى ساتقانى ءۇشىن كىنالى دەپ تانىلعان بولاتىن.
ايتا كەتەيىك، Bek Air ۇشاق اپاتى 2019 جىلعى 27 جەلتوقساندا بولعان ەدى. لاينەر الماتى اۋەجايى ماڭىنداعى ۋچاسكەدە زاڭسىز سالىنعان ۇيلەرگە قۇلاعان بولاتىن. بورتتا 93 جولاۋشى جانە بەس ەكيپاج مۇشەسى بولعان. وقيعا سالدارىنان 15 ادام قازا تاپقان ەدى.
”ادىرنا” ۇلتتىق پورتالى
