Talǵar aýdany ákimdiginiń burynǵy sheneýnikteri 2017-2019 jyldar aralyǵynda Almaty áýejaıyna jaqyn jerlerdi zańsyz ıelikten shyǵarǵany jáne satqany úshin sottaldy, dep habarlady “Adyrna” ulttyq portaly.
Talǵar aýdandyq sotynyń málimetinshe, sheneýnikterge 361-baptyń 1-bóligi (Bılikti asyra paıdalaný), 362-bólimniń 4-bóligi (Bılikti nemese laýazymdy bılikti asyra paıdalaný) jáne 190-baptyń 4-bóligi (Alaıaqtyq) boıynsha aıyp taǵylǵan. Prokýror aıyptalýshylardy 2 jyldan 8 jylǵa deıin bas bostandyǵynan aıyrýdy suraǵan, al olar kinásin moıyndamaı, ózderin aqtaýdy suraǵan.
Nátıjesinde sottalýshylardyń kinási sarapshylardyń qorytyndylary, qatysýshylardyń, kýágerlerdiń aıǵaqtary, jasyryn tergeý áreketteriniń nátıjeleri boıynsha dáleldengen.
Talǵar aýdany Panfılov aýyldyq okrýginiń burynǵy ákimi A. «Ókilettigin asyra paıdalaný jáne alaıaqtyq» baptary boıynsha kináli dep tanylyp, qylmystyq-atqarý júıesiniń ortasha qaýipsiz mekemelerinde jazasyn óteı otyryp, 8 jylǵa bas bostandyǵynan aıyryldy.
Aýdannyń burynǵy bas sáýletshisi R. ókilettigin asyra paıdalanǵany úshin kináli dep tanylyp, 6 jylǵa bas bostandyǵynan aıyryldy, ol qylmystyq-atqarý júıesiniń ortasha qaýipsiz mekemelerinde jazasyn óteıdi.
Qala ákimdiginiń jer máseleleri jónindegi bas mamany osy qylmystarǵa qatysqany úshin kináli dep tanylyp, 5 jylǵa bas bostandyǵynan aıyryldy.
«Jer qatynastary bólimi» MM basshysy T. 371-baptyń 2-bóligi «Nemquraılylyq» boıynsha kináli dep tanylyp, oǵan eki jylǵa bas bostandyǵyn shekteý jazasy taǵaıyndaldy. Alaıda úkimge Almaty qalasy Medeý aýdandyq №2 sotynyń 2022 jylǵy 18 naýryzdaǵy úkimi boıynsha taǵaıyndalǵan alty jylǵa bas bostandyǵynan aıyrý jazasy qosylǵan. Osylaısha, oǵan alty jyl úsh aıǵa bas bostandyǵynan aıyrý jazasy taǵaıyndaldy.
«Jer qatynastary bólimi» MM basshysynyń mindetin atqarýshy K. «Nemquraılylyq» baby boıynsha kináli dep tanylyp, eki jylǵa bas bostandyǵyn shekteý jazasyna kesildi, alaıda raqymshylyq boıynsha negizgi jazadan bosatyldy.
Úkim shyǵarý kezinde jeńildetetin (balalarynyń bolýy, zeınet jasy), sondaı-aq, aýyrlatatyn mán-jaı eskerilgen. Barlyq sottalýshy memlekettik qyzmette jumys isteý quqyǵynan aıyrylǵan.
Úkim áli zańdy kúshine enbegen.
Eske salaıyq, 2021 jylǵy mamyrda Talǵar aýdanynyń jergilikti sheneýnikteri men rıeltor 2019 jyly Bek Air ushaǵy apatqa ushyraǵan aýdandaǵy, Gúldala aýylyndaǵy jerdi satqany úshin kináli dep tanylǵan bolatyn.
Aıta keteıik, Bek Air ushaq apaty 2019 jylǵy 27 jeltoqsanda bolǵan edi. Laıner Almaty áýejaıy mańyndaǵy ýchaskede zańsyz salynǵan úılerge qulaǵan bolatyn. Bortta 93 jolaýshy jáne bes ekıpaj múshesi bolǵan. Oqıǵa saldarynan 15 adam qaza tapqan edi.
”Adyrna” ulttyq portaly
