"ۇلتتىق قۇرىلتايدا نەندەي شەشىم قابىلدايدى؟ ەگەر حالىقتى جيناماسا، حالىقتىڭ مۇڭىن تىڭداماسا، حالىقتىڭ ۇسىنىسىن ەلەمەيتىن بولسا، وندا قانداي جالپىۇلتتىق قۇرىلتاي؟ ول جالپىۇلتتىق قۇرىلتاي ەمەس حالىقتى الداپ، تاعى دا باستان سيپاپ قويۋ". بۇل پىكىردى بەلگىلى ساياساتكەر، قوعام قايراتكەرى بالتاش تۇرسىمباي Adyrna.kz ۇلتتىق پورتالىنىڭ تىلشىسىنە بەرگەن سۇحباتىندا ايتتى.
"كوپتەگەن ازاماتتاردىڭ پىكىرىن ەلەيمىز، ناقتى قازاق ۇلتىنىڭ بولاشاعىن ويلايمىز دەپ توقاەۆ مىرزا ۇلتتىق قۇرىلتايدى وتكىزۋ تۋرالى الدىنا ماقسات قوياتىن بولسا، وندا استانادا وتكىزۋى كەرەك ەدى. نۇر-سۇلتان دەپ ايتۋعا اۋزىم بارمايدى. بىردە-ءبىر رەت ايتىپ كورگەن جوقپىن. استانا – قازاقتىڭ استاناسى ەمەس پە، جۇگىرىپ بارىپ ۇلىتاۋدا وتكىزىپ نە بار؟! ال ەندى ۇلىتاۋدا حانداردى ۇلىقتاعىسى كەلسە، باسقا ۋاقىتتا جەكە بارىپ، ۇلىقتاۋىنا بولادى", - دەيدى ساياساتكەر.
بالتاش تۇرسىمبايدىڭ ايتۋىنشا، توقاەۆ ۇلتتىق قۇرىلتايعا الدىن-الا ارنايى دايىندىقپەن كەلىپ، حالىقتىڭ مۇڭ-مۇقتاجىن تىڭداپ، ەلدىك ماسەلەگە بەي-جاي قارامايتىن ەلىمىزدىڭ كەز-كەلگەن ازاماتىنىڭ ۇلتتىق قۇرىلتايعا قاتىسۋىنا جول اشۋى كەرەك ەدى.
"استانادا حالىقتىڭ سالىعىنان جينالعان اقشاعا سالىنعان ءزاۋلىم سارايلاردىڭ جەتكىلىكتىلىگىن ءبىز بىلەمىز. سول عيماراتتارعا 2000-3000 ادام سىيادى. ەسىك بارلىعىنا اشىق بولۋى كەرەك. ەرتەرەك جاريالاۋ كەرەك. توقاەۆ مىرزا حالىقتىڭ پىكىرىن ەسكەرۋى كەرەك. پرەزيدەنتتىڭ جانىندا جۇرگەن اناۋ شەنەۋنىكتەردىڭ ءبارى حالىقتىڭ مۇڭىن تىڭداۋى كەرەك. ۇسىنىستارىنىڭ بارلىعىن قابىلداۋى كەرەك. سودان كەيىن 10 كۇن وتە مە، 15 كۇن وتە مە حالىققا قابىلدانعان شەشىمدى جاريالاۋى كەرەك. مىنەكەي، ءبىز جالپىۇلتتىق قۇرىلتايدى وتكىزدىك. ەندى جالپىۇلتتىق قۇرىلتايدى وتكىزگەننەن كەيىن حالىقتىڭ ۇسىنىسىنا بايلانىستى وسىنداي وسىنداي شەشىم قابىلداندى دەۋى كەرەك. ايتپەسە، ۇلىتاۋعا تىعىلىپ بارىپ، جالپىۇلتتىق قۇرىلتاي دەپ اتاۋدىڭ نە كەرەگى بار؟", - دەيدى قوعام قايراتكەرى.
ساياساتكەردىڭ ساراپتاۋىنشا، 16-سى كۇنى وتەتىن ۇلتتىق قۇرىلتايعا حالىقتىڭ ورنىنا كىلەڭ مينيسترلەر، دەپۋتاتتار، اكىمدەر، ت.ب. مەملەكەتكە جاقىن ادامداردى جيناعاننان ەشقانداي ناتيجە شىقپايدى.
"قازىر ەندى 16-سىندا كورەمىز. كوپ قالعان جوق قوي. بۇگىن 15-ءسى، سوسىن 16-سى. ەندى جينايتىندارى ءبىر الگى «تۋفلي جالاعىش» جاعىمپاز ادامدار شىعار. سولاردى جيناپ الادى دا، ءبىر 2-3-ەۋىن سويلەتەدى. كىم قاتىسادى وندا؟ مينيسترلەر، دەپۋتاتتار، سودان كەيىن قاتىساتىندار اناۋ اكىمدەر. ونداي جينالىستى كۇندە وتكىزىپ جۇرگەن جوق پا؟ سەلەكتورنىي جينالىس دەيدى ت.ب. ال ەندى ول ءۇشىن ۇلىتاۋعا شاتىر تىگىپ، اقشا شىعارىپ، ونى جەلگە شاشىپ ۇيىمداستىراتىن نەمەنە ۇلتتىق قۇرىلتاي ول؟ سوندىقتان بۇنىڭ بارلىعى ەسكىدەن قالعان. "ۇلتتىق قۇرىلتاي" دەپ وتىرىكتى ايتىپ، حالىقتى توناپ، قاڭعىرتىپ كەتكەن ۇرى نازارباەۆتىڭ سالىپ كەتكەن جولىن جالعاستىرىپ جاتىر. نەگە دەسەڭ، ۇلىتاۋدا ءزاۋلىم ساراي جوق، ۇلىتاۋدا ءبىر سونداي اسىپ كەتكەن ۇڭگىرلەر جوق. قازىر اق شاتىر تىگىپ، شەشىم قابىلدايدى. ۇلتتىق قۇرىلتايدا نەندەي شەشىم قابىلدايدى؟ ەگەر حالىقتى جيناماسا، حالىقتىڭ مۇڭىن تىڭداماسا، حالىقتىڭ ۇسىنىسىن ەلەمەيتىن بولسا، وندا قانداي جالپىۇلتتىق قۇرىلتاي؟ ول جالپىۇلتتىق قۇرىلتاي ەمەس حالىقتى الداپ، تاعى دا باستان سيپاپ قويۋ!",- دەيدى بالتاش تۇرسىمباي.
بالتاش تۇرسىمبايدىڭ ايتۋىنشا، كەشەگى "قاڭتار" نازارباەۆتىڭ توبىرىنىڭ موينىندا.
"بىراق، توقاەۆ مىرزا دا، جانىنداعى شەنەۋنىكتەر دە! دەپۋتاتى بار، ءمينيسترى بار، اكىمى بار! حالىقتى ءومىر باقي الدايمىز دەپ ويلاماسىن. الداي المايدى! مىنەكەي، 30 جىل حالىقتى الداپ، ۇرلاپ، وسىنداي كۇيزەلىس جاعدايعا جەتكىزگەن نازارباەۆ «قاڭتاردىڭ» نە ەكەنىن كوردى. قاڭتاردا حالىق شىقتى. بىراق سول حالىقتى ۇرىپ، اتقىزدى، 230 ادام و دۇنيەگە كەتتى. سونىڭ ءبارىنىڭ كىناسى – اناۋ نازارباەۆتىڭ توبىرىنىڭ موينىندا. ونىڭ زاردابىن ولار شەگەدى، ونىڭ قانىن جۇكتەپ كوپ جۇرە المايدى. سوندىقتان حالىقتىڭ الدىندا جاۋاپ بەرەدى! ال ەندى ناقتى قۇرىلتاي دەپ وتكىزىپ كەلەشەكتى تالقىلايتىن بولسا، نە ىستەۋىمىز كەرەك دەپ تالقىلايتىن بولسا، وندا ءار وبلىستىڭ جاناشىر وكىلدەرىن، ۇلت جاناشىرلارىن جيناسىن! تىڭداسىن، سودان كەيىن شەشىم قابىلداسىن! سوندا قۇرىلتاي دەۋگە بولادى. ال بۇل ءجاي جينالىس قوي. ەرىككەندەردىڭ اڭگىمەسى", - دەپ قورىتىندىلادى ءسوزىن ساياساتكەر.
زارينا اشىربەك،
"ادىرنا" ۇلتتىق پورتالى
