"Ūlttyq qūryltaida nendei şeşım qabyldaidy? Eger halyqty jinamasa, halyqtyŋ mūŋyn tyŋdamasa, halyqtyŋ ūsynysyn elemeitın bolsa, onda qandai jalpyūlttyq qūryltai? Ol jalpyūlttyq qūryltai emes halyqty aldap, taǧy da bastan sipap qoiu". Būl pıkırdı belgılı saiasatker, qoǧam qairatkerı Baltaş Tūrsymbai Adyrna.kz ūlttyq portalynyŋ tılşısıne bergen sūhbatynda aitty.
"Köptegen azamattardyŋ pıkırın eleimız, naqty qazaq ūltynyŋ bolaşaǧyn oilaimyz dep Toqaev myrza Ūlttyq qūryltaidy ötkızu turaly aldyna maqsat qoiatyn bolsa, onda Astanada ötkızuı kerek edı. Nūr-Sūltan dep aituǧa auzym barmaidy. Bırde-bır ret aityp körgen joqpyn. Astana – qazaqtyŋ astanasy emes pe, jügırıp baryp Ūlytauda ötkızıp ne bar?! Al endı Ūlytauda handardy ūlyqtaǧysy kelse, basqa uaqytta jeke baryp, ūlyqtauyna bolady", - deidı saiasatker.Baltaş Tūrsymbaidyŋ aituynşa, Toqaev Ūlttyq qūryltaiǧa aldyn-ala arnaiy daiyndyqpen kelıp, halyqtyŋ mūŋ-mūqtajyn tyŋdap, eldık mäselege bei-jai qaramaityn elımızdıŋ kez-kelgen azamatynyŋ Ūlttyq qūryltaiǧa qatysuyna jol aşuy kerek edı.
"Astanada halyqtyŋ salyǧynan jinalǧan aqşaǧa salynǧan zäulım sarailardyŋ jetkılıktılıgın bız bılemız. Sol ǧimarattarǧa 2000-3000 adam syiady. Esık barlyǧyna aşyq boluy kerek. Erterek jariialau kerek. Toqaev myrza halyqtyŋ pıkırın eskeruı kerek. Prezidenttıŋ janynda jürgen anau şeneunıkterdıŋ bärı halyqtyŋ mūŋyn tyŋdauy kerek. Ūsynystarynyŋ barlyǧyn qabyldauy kerek. Sodan keiın 10 kün öte me, 15 kün öte me halyqqa qabyldanǧan şeşımdı jariialauy kerek. Mınekei, bız jalpyūlttyq qūryltaidy ötkızdık. Endı jalpyūlttyq qūryltaidy ötkızgennen keiın halyqtyŋ ūsynysyna bailanysty osyndai osyndai şeşım qabyldandy deuı kerek. Äitpese, Ūlytauǧa tyǧylyp baryp, jalpyūlttyq qūryltai dep ataudyŋ ne keregı bar?", - deidı qoǧam qairatkerı.Saiasatkerdıŋ saraptauynşa, 16-sy künı ötetın Ūlttyq qūryltaiǧa halyqtyŋ ornyna kıleŋ ministrler, deputattar, äkımder, t.b. memleketke jaqyn adamdardy jinaǧannan eşqandai nätije şyqpaidy.
"Qazır endı 16-synda köremız. Köp qalǧan joq qoi. Bügın 15-sı, sosyn 16-sy. Endı jinaityndary bır älgı «tufli jalaǧyş» jaǧympaz adamdar şyǧar. Solardy jinap alady da, bır 2-3-euın söiletedı. Kım qatysady onda? Ministrler, deputattar, sodan keiın qatysatyndar anau äkımder. Ondai jinalysty künde ötkızıp jürgen joq pa? Selektornyi jinalys deidı t.b. Al endı ol üşın Ūlytauǧa şatyr tıgıp, aqşa şyǧaryp, ony jelge şaşyp ūiymdastyratyn nemene Ūlttyq qūryltai ol? Sondyqtan būnyŋ barlyǧy eskıden qalǧan. "Ūlttyq qūryltai" dep ötırıktı aityp, halyqty tonap, qaŋǧyrtyp ketken ūry Nazarbaevtyŋ salyp ketken jolyn jalǧastyryp jatyr. Nege deseŋ, Ūlytauda zäulım sarai joq, Ūlytauda bır sondai asyp ketken üŋgırler joq. Qazır aq şatyr tıgıp, şeşım qabyldaidy. Ūlttyq qūryltaida nendei şeşım qabyldaidy? Eger halyqty jinamasa, halyqtyŋ mūŋyn tyŋdamasa, halyqtyŋ ūsynysyn elemeitın bolsa, onda qandai jalpyūlttyq qūryltai? Ol jalpyūlttyq qūryltai emes halyqty aldap, taǧy da bastan sipap qoiu!",- deidı Baltaş Tūrsymbai.Baltaş Tūrsymbaidyŋ aituynşa, keşegı "Qaŋtar" Nazarbaevtyŋ tobyrynyŋ moinynda.
"Bıraq, Toqaev myrza da, janyndaǧy şeneunıkter de! Deputaty bar, ministrı bar, äkımı bar! Halyqty ömır baqi aldaimyz dep oilamasyn. Aldai almaidy! Mınekei, 30 jyl halyqty aldap, ūrlap, osyndai küizelıs jaǧdaiǧa jetkızgen Nazarbaev «Qaŋtardyŋ» ne ekenın kördı. Qaŋtarda halyq şyqty. Bıraq sol halyqty ūryp, atqyzdy, 230 adam o düniege kettı. Sonyŋ bärınıŋ kınäsı – anau Nazarbaevtyŋ tobyrynyŋ moinynda. Onyŋ zardabyn olar şegedı, onyŋ qanyn jüktep köp jüre almaidy. Sondyqtan halyqtyŋ aldynda jauap beredı! Al endı naqty qūryltai dep ötkızıp keleşektı talqylaityn bolsa, ne ısteuımız kerek dep talqylaityn bolsa, onda är oblystyŋ janaşyr ökılderın, ūlt janaşyrlaryn jinasyn! Tyŋdasyn, sodan keiın şeşım qabyldasyn! Sonda qūryltai deuge bolady. Al būl jäi jinalys qoi. Erıkkenderdıŋ äŋgımesı", - dep qorytyndylady sözın saiasatker.
Zarina ÄŞIRBEK,
"Adyrna" ūlttyq portaly
