ءماجىلىس دەپۋتاتى ەدىل جاڭبىرشين قازاقستاندا سۋ ماسەلەسىنە جاۋاپتى جاڭا مينيسترلىك قۇرۋ تۋرالى باستاما كوتەردى، دەپ حابارلايدى “ادىرنا” ۇلتتىق پورتالى.
دەپۋتاتتىڭ ايتۋىنشا، ەلىمىزدە سۋ ماسەلەسىمەن اينالىساتىن ورگان كوپ. ياعني سۋ سالاسىنىڭ باعىتتارىن باسقارۋ مەن رەتتەۋ 3 مينيسترلىككە ءبولىنىپ بەرىلگەن. وسىنىڭ سالدارىنا اتالمىش سالانىڭ پوتەنتسيالى ءالى دۇرىس اشىلماي وتىر.
«سۋ بىزدە ۇلكەن - رەسۋرس. سۋسىز حالىقتىڭ ءال-اۋقاتىن كوتەرۋ مۇمكىن ەمەس. سوندىقتان ءبىر مينيسترلىك قۇرىپ وسى ماسەلەلەربدىڭ بارىمەن جۇيەلى تۇردە اينالىسۋى كەرەك. ءتىپتى ترانسشەكارالىق سۋ رەسۋرستارىمەن سىرتقى ىستەر مينيسترلىگى دە اينالىسىپ كەتەدى. باقتاشى كوپ، ناتيجەسى ماردىمسىز. كورشى مەملەكەتتەردى الىپ قاراساق، ولاردا سۋ شارۋاشىلىعىمەن ءتيىستى مينيسترلىك نەمەسە اگەنتتىك اينالىسىپ وتىر. بۇل ماسەلەنىڭ وزەكتى ەكەنىن ءماجىلىس توراعاسى ەرلان قوشانوۆ اتاپ ءوتتى. سوندىقتان سۋ سالاسىنا جاۋاپتى جانە قازاقستان اتىنان حالىقارالىق دەڭگەيدە كەلىسسوزدەر جۇرگىزەتىن ءتيىستى مينيسترلىك قۇرۋدىڭ ۋاقىتى كەلگەن سياقتى", - دەيدى دەپۋتات.
سونداي-اق ول اۋىز سۋ ماسەلەسىنە قاتىستى تۇجىرىمداما ۋاقىتىن ۇزارتۋ كەرەك ەكەنىن ايتادى.
«وسىعان بايلانىستى ەكولوگيا مينيسترلىگىندە دايىندالىپ جاتقان سۋ تۇجىرىمداماسىنىڭ گوريزونتىن 2025 جىلعا دەيىن ەمەس، 2030 جىلعا دەيىن ۇزارتۋ كەرەك. بۇل قۇجاتتى دايىنداۋعا، تالقىلاۋعا ارنايى عىلىمي زەرتتەۋ ينستيتۋتتارى مەن مامانداردى كەڭىنەن تارتقان ءجون»، - دەدى ەدىل جاڭبىرشين ماجىلىستە ءوتىپ جاتقان پارلامانتتىك تىڭداۋدا.
”ادىرنا” ۇلتتىق پورتالى
