وقۋ جىلى قارساڭىندا دەنساۋلىق ساقتاۋ مينيسترلىگى اتا-انالارعا ۇندەۋ جاسادى، دەپ حابارلايدى "ادىرنا" ءتىلشىسى.
مينيسترلىك بالالاردىڭ ۇيقى رەجيمىن الدىن الا قالىپقا كەلتىرۋگە كەڭەس بەردى. ۆەدومستۆو ماماندارى كانيكۋلدان كەيىن بىردەن ەمەس، مەكتەپتەگى كۇن تارتىبىنە بىرتىندەپ كوشۋدىڭ ماڭىزىن اتاپ ءوتتى.
مامانداردىڭ مالىمەتىنشە، 6-12 جاستاعى بالالار تاۋلىگىنە 9-12 ساعات، ال 13-18 جاستاعى جاسوسپىرىمدەر 8-10 ساعات ۇيىقتاۋى قاجەت. ءبىرىنشى سىنىپ وقۋشىلارى ءۇشىن وقۋ جۇكتەمەسى مەن جاڭا ورتاعا بەيىمدەلۋ كەزەڭىنە بايلانىستى كۇندىز 2 ساعاتقا دەيىن قوسىمشا ۇيىقتاۋعا بولادى.
ۇيقى رەجيمىن قالپىنا كەلتىرۋ ءۇشىن دەنساۋلىق ساقتاۋ مينيسترلىگى:
* ۇيىقتاۋ جانە ويانۋ ۋاقىتىن بىرتىندەپ ەرتەرەك ۋاقىتقا اۋىستىرۋدى;
* ۇيقىعا دەيىن كەمىندە ءبىر ساعات بۇرىن گادجەتتەردى قولدانۋدى جانە بەلسەندى ويىنداردى توقتاتۋدى;
* دەمالىس كۇندەرىن قوسا العاندا، كۇن سايىن بىردەي ۇيقى كەستەسىن ساقتاۋدى;
* جاتىن بولمەنى جەلدەتىپ، ۇيقى الدىندا كىتاپ وقۋ نەمەسە سەرۋەندەۋ سياقتى تىنىش ادەتتەردى قالىپتاستىرۋدى ۇسىنادى.
مينيسترلىك تولىققاندى ءارى تۇراقتى ۇيقى بالانىڭ زەيىنىنە، ەستە ساقتاۋ قابىلەتىنە، ەموتسيونالدىق جاعدايىنا جانە وقۋ ۇلگەرىمىنە تىكەلەي اسەر ەتەتىنىن اتاپ ءوتتى.
