تاراز قالاسىنداعى №40 گيمنازيا اۋماعىندا 10-سىنىپ وقۋشىسى بيىكتىكتەن قۇلاپ، اۋىر جاراقات الدى، دەپ حابارلايدى "ادىرنا" ۇلتتىق پورتالى.
جامبىل وبلىستىق پوليتسيا دەپارتامەنتى وقيعاعا قاتىستى اقپاراتتى راستادى. ۆەدومستۆونىڭ مالىمەتىنشە، اتالعان دەرەك بويىنشا قازاقستان رەسپۋبليكاسى قىلمىستىق كودەكسىنىڭ 114-بابىنىڭ 3-بولىگى – «ابايسىزدا اۋىر دەنە جاراقاتىن كەلتىرۋ» بويىنشا قىلمىستىق ءىس قوزعالعان.
«قازىرگى ۋاقىتتا پوليتسيا قىزمەتكەرلەرى وقيعانىڭ بارلىق ءمان-جايىن تەكسەرىپ جاتىر. تەرگەۋ ناتيجەلەرى بويىنشا قولدانىستاعى زاڭناماعا سايكەس پروتسەسسۋالدىق شەشىم قابىلدانادى»، – دەلىنگەن حابارلامادا.
سونداي-اق قۇقىق قورعاۋ ورگاندارى قىلمىستىق ءىس جۇرگىزۋ كودەكسىنىڭ 201-بابىنا سايكەس تەرگەۋ مۇددەسىنە بايلانىستى وزگە اقپارات جاريالانبايتىنىن مالىمدەدى.
باق مالىمەتىنشە، ءجاسوسپىرىم مەكتەپ عيماراتىنىڭ سىرتىندا ورنالاسقان ورتتەن ەۆاكۋاتسيالاۋ باسپالداعىنا شىققان. بەينەباقىلاۋ كامەرالارىنداعى جازبالاردا ونىڭ قورشاۋدا وتىرعانى، كەيىن تەپە-تەڭدىگىن جوعالتىپ، قۇلاپ كەتكەنى بايقالادى.
وقيعادان كەيىن وقۋشى وبلىستىق بالالار اۋرۋحاناسىنا جەتكىزىلگەن. دارىگەرلەر وعان مي جاراقاتى، وڭ جاق سان سۇيەگى مەن بۇعانا سۇيەگىنىڭ سىنۋى، سونداي-اق ىشكى مۇشەلەرىنىڭ زاقىمدانۋى دياگنوزىن قويعان. قازىرگى ۋاقىتتا ءجاسوسپىرىم جانساقتاۋ بولىمىندە جاتىر، جاعدايى وتە اۋىر دەپ باعالانۋدا.
