مەملەكەت باسشىسى قاسىم-جومارت توقاەۆ «مەملەكەتتىك قىزمەتكەرلەر جانە بۇكىل قوعام ءبىرتۇتاس ەل رەتىندە الدىمىزدا تۇرعان مىندەتتەردى ورىنداۋ ءۇشىن جۇمىلۋعا ءتيىس» دەي كەلە، عىلىمعا دا بەت بۇرۋ قاجەتتىگىن العا تارتىپ، باسا نازار اۋدارعان بولاتىن.
پرەزيدەنتتىڭ العا قويعان مىندەتتەرىن ورىنداۋدا جوعارى وقۋ ورىندارى دا بەلسەندىلىك تانىتىپ، قىرۋار جۇمىس جۇرگىزىپ وتىر.
قازاقستان ينجەنەرلىك-تەحنولوگيالىق ۋنيۆەرسيتەتىندە «جاڭا قازاقستان: ەل دامۋىنىڭ پاراديگماسىنىڭ وزگەرۋى: جوعارى مادەنيەت جانە ءبىلىم» اتتى حالىقارالىق عىلىمي-تاجىريبەلىك كونفەرەنتسيا ءوتتى. وعان رەسەي، تاجىكستان، قىرعىزستان جانە ت.ب. شەتەلدەن ارنايى شاقىرىلعان ماماندار، عالىمدار قاتىستى.
العاشقى ءسوزدى قازاقستان ينجەنەرلىك-تەحنولوگيالىق ۋنيۆەرسيتەتىنىڭ رەكتورى گۇلنار سارسەنبەكوۆا الىپ، اتالعان وقۋ ورنى تۇراقتى دامۋدىڭ جاھاندىق مىندەتتەرىن شەشۋگە قابىلەتتى كوشباسشىلاردىڭ جاڭا بۋىنىن قالىپتاستىرۋدا جۇمىس ىستەپ جاتقانىن اتاپ ءوتىپ، كونفەرەنتسياعا قاتىسۋشىلارعا ساتتىلىك تىلەدى.
وڭتۇستىك-ورال مەملەكەتتىك ۋنيۆەرسيتەتىنىڭ (ۇلتتىق زەرتتەۋ ۋنيۆەرسيتەتى) كافەدرا مەڭگەرۋشىسى يرينا پوتوروكو «پيكەرينگ ەمۋلسيالارى نەگىزىندەگى جاڭا بۋىن تاماق جۇيەلەرىنىڭ تەحنولوگياسى» تاقىرىبىن جان-جاقتى قوزعادى. ول ءوز سوزىندە ستراتەگيالىق ماقسات – جاھاندىق عىلىمي جانە تەحنولوگيالىق كوشباسشىلىققا قول جەتكىزۋ، ۇلكەن ورالدىڭ يندۋسترياسىنا ازىرلەمەلەردى ەنگىزۋ ەكەنىن تىلگە تيەك ەتتى.
«ج.جيەنباەۆ اتىنداعى قازاق وسىمدىكتەردى قورعاۋ جانە كارانتين عىلىمي-زەرتتەۋ ينستيتۋتى» جشس باسقارما توراعاسىنىڭ عىلىم جونىندەگى ورىنباسارى جان نيازبەكوۆ فيتوسانيتارلىق قاۋىپسىزدىكتى قامتاماسىز ەتۋدەگى وسىمدىكتەردى قورعاۋ جانە كارانتين پەرسپەكتيۆالارىن كەڭىنەن قاۋزاسا، تاۋلى التاي مەملەكەتتىك ۋنيۆەرسيتەتىنىڭ رەكتورى ۆيتالي نەدەلسكي كومپانيالار مەن بيزنەس-مودەلدەردىڭ سىن-قاتەرلەرى مەن ترانسفورماتسيالارى، پلاتفورمالىق ەكوجۇيەلەر مەن سەرۆيستىك مودەلدەردى نەگىزگە الا وتىرىپ، ءوسىپ كەلە جاتقان كۇردەلىلىك الەمىندەگى وزگەرىستەردى ەنگىزۋ، وزگەرىستەرگە قارسى تۇرۋ جانە جۇمىس ورىندارىن ترانسفورماتسيالاۋ تۋرالى باياندادى.
ۇلتتىق بيوتەحنولوگيا ورتالىعى باس ديرەكتورىنىڭ ورىنباسارى ۆلاديمير كيان اوك سالاسىنداعى بيوتەحنولوگيانىڭ مۇمكىندىكتەرى مەن دامۋ پەرسپەكتيۆالارىن ءسوز ەتسە، ي.روگوۆ اتىنداعى قولدانبالى بيوتەحنولوگيا ينستيتۋتىنىڭ ديرەكتورى تاتيانا دانيلچۋك رەسەي مەن قازاقستانداعى جىلقى ەتىنەن جاسالعان ىستالعان شۇجىق نارىعىنىڭ جاعدايىنا توقتالدى.
پلەنارلىق وتىرىستىڭ سوڭى سەكتسيا جۇمىسىمەن جالعاستى. «اۋىل شارۋاشىلىعى: دامۋ ماسەلەلەرى مەن بولاشاعى»، «تەحنيكا مەن تەحنولوگيانى دامىتۋدىڭ يننوۆاتسيالىق اسپەكتىلەرى»، «تىرشىلىك قاۋىپسىزدىگى جانە ەكولوگيا ماسەلەلەرىن شەشۋدەگى جاڭا عىلىمي تاسىلدەر»، «ەكونوميكا، باسقارۋ جانە ەكونوميكالىق قاۋىپسىزدىكتىڭ وزەكتى ماسەلەلەرى» جانە «قازىرگى عىلىمنىڭ پاراديگماسى – وركەنيەتتىڭ الەۋمەتتىك-گۋمانيتارلىق اسپەكتىلەرىنىڭ ۇيلەسىمدىلىگىنە جول» تاقىرىبىن قامتىعان سەكتسيا جۇمىسى ءساتتى اياقتالدى.
حالىقارالىق عىلىمي-تاجىريبەلىك كونفەرەنتسيا جۇمىسىنا قاتىسۋشىلار كونفەرەنتسيانىڭ جوعارى دەڭگەيدە ۇيىمداستىرىلعان اتاپ ءوتىپ، ۇيىمداستىرۋشىلارعا العىس ايتتى.
”ادىرنا” ۇلتتىق پورتالى
