بۇگىن قازاقستاننىڭ حالىق جازۋشىسى، قىرعىز رەسپۋبليكاسىنىڭ حالىق اقىنى مۇحتار شاحانوۆ 80 جاسقا تولدى، دەپ حابارلايدى «ادىرنا» ءتىلشىسى.
ول 1942 جىلى 2 شىلدەدە وڭتۇستىك قازاقستان وبلىسى، وتىرار اۋدانى، شىلىك اۋىلىندا دۇنيەگە كەلگەن. جەتى جىلدىق مەكتەپتى بىتىرگەن سوڭ، تراكتوردىڭ تىركەۋشىسى، وبلىستىق «وڭتۇستىك قازاقستان» گازەتىندە كوررەكتور، ادەبي قىزمەتكەر، «لەنينشىل جاس» گازەتىندە وڭتۇستىك وبلىستار بويىنشا مەنشىكتى ءتىلشى، قازاقستان جازۋشىلار وداعى باسقارماسىنىڭ حاتشىسى، رەسپۋبليكالىق «جالىن» جۋرنالىنىڭ باس رەداكتورى، ت.ب. قىزمەتتەر اتقاردى. كسرو حالىق دەپۋتاتى، كسرو جوعارعى كەڭەسىنىڭ مۇشەسى، قر حالىق دەپۋتاتى بولدى.
1993-2003 جج. قازاقستان رەسپۋبليكاسىنىڭ قىرعىز رەسپۋبليكاسىنداعى توتەنشە جانە وكىلەتتى ەلشىسى قىزمەتىندە بولدى. 2003-2004 جج. «جالىن» جۋرنالىنىڭ باس رەداكتورى، الەم ويشىلدارىنىڭ باسىن بىرىكتىرەتىن «ءححى عاسىر جانە رۋحانيات» اتتى حالىقارالىق ەليتا كلۋبىنىڭ پرەزيدەنتى.
2004 جىلى قر پارلامەنتى ءماجىلىسىنىڭ دەپۋتاتى بولدى.
كوپتەگەن ولەڭ كىتاپتارىنىڭ جانە حالىق اراسىنا كەڭ تاراعان بىرقاتار اندەردىڭ اۆتورى. باللادالارى مەن پوەمالارى دۇنيە ءجۇزى حالىقتارىنىڭ 20-دان استام تىلدەرىنە اۋدارىلعان. «ماحاببات زاڭى»، «سەنىم پاتشالىعى»، «سوكراتتى ەسكە الۋ ءتۇنى» اتتى درامالارى رەسپۋبليكامىزدا جانە شەتەل تەاترلارىندا قويىلعان.
