Búgin Qazaqstannyń halyq jazýshysy, Qyrǵyz Respýblıkasynyń halyq aqyny Muhtar Shahanov 80 jasqa toldy, dep habarlaıdy «Adyrna» tilshisi.
Ol 1942 jyly 2 shildede Ońtústik Qazaqstan oblysy, Otyrar aýdany, Shilik aýylynda dúnıege kelgen. Jeti jyldyq mektepti bitirgen soń, traktordyń tirkeýshisi, oblystyq «Ońtústik Qazaqstan» gazetinde korrektor, ádebı qyzmetker, «Lenınshil jas» gazetinde ońtústik oblystar boıynsha menshikti tilshi, Qazaqstan Jazýshylar odaǵy basqarmasynyń hatshysy, respýblıkalyq «Jalyn» jýrnalynyń bas redaktory, t.b. qyzmetter atqardy. KSRO halyq depýtaty, KSRO Joǵarǵy Keńesiniń múshesi, QR Halyq depýtaty boldy.
1993-2003 jj. Qazaqstan Respýblıkasynyń Qyrǵyz respýblıkasyndaǵy Tótenshe jáne Ókiletti Elshisi qyzmetinde boldy. 2003-2004 jj. «Jalyn» jýrnalynyń bas redaktory, álem oıshyldarynyń basyn biriktiretin «HHI ǵasyr jáne Rýhanııat» atty halyqaralyq elıta klýbynyń Prezıdenti.
2004 jyly QR Parlamenti Májilisiniń depýtaty boldy.
Kóptegen óleń kitaptarynyń jáne halyq arasyna keń taraǵan birqatar ánderdiń avtory. Balladalary men poemalary dúnıe júzi halyqtarynyń 20-dan astam tilderine aýdarylǵan. «Mahabbat zańy», «Senim patshalyǵy», «Sokratty eske alý túni» atty dramalary respýblıkamyzda jáne shetel teatrlarynda qoıylǵan.
