ماڭعىستاۋدا مەملەكەتتىك اتتەستاتسيالاۋدان 16 مەكتەپ وتپەي قالدى. بۇل تۋرالى وبلىستىق ءبىلىم سالاسىنداعى ساپانى قامتاماسىز ەتۋ دەپارتامەنتى ءمالىم ەتتى.
اقتاۋ، جاڭاوزەن قالاسى، ماڭعىستاۋ، مۇنايلى، قاراقيا، بەينەۋ اۋداندارىندا 21 مەكتەپ، 31 بالاباقشا، 1 كوللەدجگە تەكسەرۋ جۇرگىزىلگەن. 11 بالاباقشا جارامسىز بولعان. 21 مەكتەپتىڭ 16-سى تالاپتارعا سايكەس ەمەس. ءبىرىنشى اتتەستاتتاۋدان وتپەگەندەرگە كەمشىلىكتەردى جويۋ ءۇشىن ۋاقىت بەرىلدى.
«وقۋ جوسپارىنىڭ ورىندالۋى، بالالاردىڭ ءبىلىم دەڭگەيىنە قويىلاتىن تالاپتار بويىنشا قارالادى. 4, 9, 11-سىنىپتاردان باقىلاۋ تەستىسى الىنادى. ەڭ ءبىرىنشى تەستىلەۋ مەزگىلىندە وسىنداي بالالاردىڭ شەكتىك دەڭگەيدەن وتپەي قالعاندارى بولدى. ەكىنشى، وقۋ جوسپارىنىڭ ورىندالماي قالۋىنا بايلانىستى، ماتەريالدىق-تەحنيكالىق بازاسىنا بايلانىستى كەمشىلىكتەر بولدى»، - دەيدى ماڭعىستاۋ وبلىستىق ءبىلىم سالاسىنداعى ساپانى قامتاماسىز ەتۋ دەپارتامەنتىنىڭ باسشىسى ەسبولات ومىرزاق.
“ادىرنا” ۇلتتىق پورتالى
