ەندى پاتەر يەسى تەك سمارتفون جانە Halyk Homebank قوسىمشاسىن پايدالانا وتىرىپ، ۇيىڭىزگە تىركەلگەن ادامدى تىركەۋدەن ونلاين شىعارۋعا بولادى. بۇرىنعىداي حقكو بارۋدىڭ قاجەتى جوق، ال قىزمەتتى قولدانۋ ۋاقىتى 20 مينۋتتان اسپايدى.
Halyk Homebank قولدانۋشىلارى ءۇشىن جاڭا ءارى ىڭعايلى سەرۆيس ىسكە قوسىلدى. بۇل قىزمەت Halyk Bank, قر ىشكى ىستەر مينيسترلىگى جانە قر تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى ىنتىماقتاستىعىنىڭ ناتيجەسى.
ۋاقىتشا نەمەسە تۇراقتى تىركەۋدەن شىعارۋ ءۇشىن جىلجىمايتىن مۇلىك يەسى Halyk Homebank قوسىمشاسىنداعى "مەم.قىزمەتتەر" بولىمىنە كىرىپ، "تىركەۋ" - "تىركەۋدەن شىعارۋ" ءبولىمىن اشىپ، جىلجىمايتىن مۇلىكتى تاڭداپ، تىركەۋدەن شىعارۋ قاجەت تۇرعىندى بەلگىلەپ، وتىنىمگە قول قويىپ، ناتيجەمەن تانىسۋ قاجەت. سەرۆيس قازاقستان رەسپۋبليكاسىنىڭ ازاماتتارىنا عانا ارنالعان. ەگەر تۇرعىن ءۇيدىڭ بىرنەشە يەسى بولسا، وندا تىركەۋدەن شىعارۋ كەزىندە تۇرعىن ءۇيدى قوسا يەلەنۋشى Halyk Homebank قوسىمشاسىندا كەلىسىمىن بەرە الادى.
بانك تۇرعىن ءۇي يەسى تۋرالى دەرەكتەر قاۋىپسىزدىگىن قامتاماسىز ەتەدى جانە اقپاراتتى ءۇشىنشى تۇلعالارعا بەرۋدەن قورعاۋعا كەپىلدىك بەرەدى. مەملەكەتتىك ورگانعا قىزمەتتى قولدانۋ ءۇشىن قاجەت دەرەكتەردى عانا ۇسىنادى.
"مەملەكەتتىك قىزمەتتەردى جۇزەگە اسىرۋ باعىتىمىز قازاقستاندىقتار ءۇشىن جاڭا مۇمكىندىك بەرەدى. ءبىز ىسكە قوسقان قىزمەتتەر ءار ادام ءۇشىن ىڭعايلى بولۋى كەرەك. ماعان، مينيستر رەتىندە، ءار قازاقستاندىق مەملەكەتتىك قىزمەتتەردى وزىنە ىڭعايلى سەرۆيستەر ارقىلى جانە كەزەكسىز، ارتىق ۋايىمسىز قولدانۋى ماڭىزدى. "تىركەۋدەن شىعارۋ" قىزمەتى - ەڭ سۇرانىسقا يە سەرۆيستىڭ ءبىرى جانە ەندى ونى ءوز سمارتفونىڭىز ارقىلى قولدانۋ ارينە قۋانىشتى جاڭالىقتىڭ ", - دەپ اتاپ ءوتتى قر تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين.
Halyk Bank باسقارما ءتورايىمى ءۇمىت شاياحمەتوۆا جاڭا سەرۆيستىڭ ىسكە قوسىلۋى تۋرالى ايتا كەلە، قازاقستاندىقتار ءۇشىن كۇن سايىن ىڭعايلى ءارى تسيفرلى قىزمەتتەر ارتىپ كەلە جاتقانىن اتاپ ءوتتى: "بۇگىندە بارلىق قىزمەتتىڭ 80%-عا جۋىعى ەلەكتروندى فورماتتا ۇسىنىلادى. ءبىز بانك رەتىندە قازاقستاندىقتار تالاپ ەتەتىن ونلاين-قىزمەتتەردى ەنگىزەمىز، بۇل مەملەكەتتىك ۆەدومستۆولارمەن ءتيىمدى ينتەگراتسيا ەسەبىنەن جۇزەگە اسىرىلادى. وسىنداي ناتيجەلى سەرىكتەستىك كليەنتتەردىڭ العىسىنا اينالادى. سەبەبى ءتيىستى ۆەدومستۆولارعا بارماي-اق ءتۇرلى قىزمەتتەردى تەز ءارى وڭاي قولدانا الادى".
قر ءىىم ءمينيسترىنىڭ ورىنباسارى ساكەن سارسەنوۆ ايتقانداي، " ءىىم قازاقستان ازاماتتارىنا كورسەتىلەتىن مەملەكەتتىك قىزمەتتەردى تسيفرلاندىرۋ جانە اۆتوماتتاندىرۋ جۇمىستارىن جالعاستىرۋدا. ايتا كەتۋ كەرەك، قر ىشكى ىستەر مينيسترلىگى بانك قوسىمشالارى ارقىلى ازاماتتار مەن اۆتوكولىكتەردى تىركەۋ سالاسىندا قىزمەت كورسەتۋدى جەڭىلدەتەتىن بىرنەشە جوبانى ىسكە قوستى. مىسالى، اعىمداعى جىلدىڭ ءساۋىر ايىنان باستاپ Halyk Homebank قوسىمشاسى ارقىلى تۇرعىلىقتى جەرى بويىنشا ۇيگە تىركەۋگە تۇرۋ نەمەسە ەگەر ءسىز تۇرعىن ءۇي يەسى بولساڭىز، ءوزىڭىز تىركەلە الاسىز".
ايتا كەتەيىك، Halyk Homebank قوسىمشاسىندا عانا ۇسىنىلعان بىرەگەي سەرۆيس العاش رەت مەملەكەت باسشىسىنىڭ قاتىسۋىمەن قر ىشكى ىستەر مينيسترلىگىنىڭ 30 جىلدىعىنا ارنالعان فورۋمدا ۇسىنىلدى.
