باس پروكۋراتۋرا ءبىرىنشى قىزمەت باستىعىنىڭ ورىنباسارى ەلدوس قيلىمجانوۆ ورتالىق كوممۋنيكاتسيالار قىزمەتىنىڭ بريفينگىندە قاڭتار وقيعاسىن تەرگەۋ ءىسى بويىنشا مالىمەتتەرمەن ءبولىستى.
"بارلىعى قاڭتار وقيعاسى بويىنشا سوتقا 479 قىلمىستىق ءىس جولدانىپ، 545 ادام سوتتالدى. بيلىك وكىلدەرىنە قاتىستى كۇش قولدانعان، مۇلىكتەردى زاقىمداۋعا بايلانىستى اۋىر قىلمىس جاساعان، سونداي-اق زالالدى وتەلمەگەن جانە وتەلمەگەن سوتتىلىعى بار 83 سوتتالۋشى ناقتى باس بوستاندىعىنان ايىرۋ جازاسىن الدى", – دەدى قيلىمجانوۆ بريفينگ بارىسىندا.
قازىر 349 كۇدىكتى قاماۋدا وتىر. ولاردىڭ قيراتۋعا، عيماراتتاردى ورتەۋگە، قارۋ جىمقىرۋعا، مەملەكەتتىك نىساندارعا جانە قۇقىق قورعاۋ ورگاندارى قىزمەتكەرلەرىنە قارۋلى شابۋىل جاساۋعا بەلسەندى تۇردە قاتىسقانى انىقتالدى.
ءاربىر قاماۋعا الىنعان ادامنىڭ وسى قىلمىستارعا قاتىسى بارىن راستايتىن مالىمەتتەر جەتكىلىكتى ەكەن.
قازىرگى تاڭدا ارنايى پروكۋرورلاردىڭ وندىرىسىندە جاپپاي تارتىپسىزدىكتەر بويىنشا 53 قىلمىستىق ءىس، تەرروريزم اكتىسى بويىنشا 32 قىلمىستىق ءىس جاتىر.
“ادىرنا” ۇلتتىق پورتالى
