باتىس قازاقستاندىق ايەل قيىندىققا مويىماي، كاسىبىن دوڭگەلەتىپ وتىر

2415
Adyrna.kz Telegram

تاعدىر سىنىنا مويىماي، ءوزىن قولعا الۋ ارقىلى العا قاراي قادام باسىپ، بولاشاعىنان ۇلكەن ءۇمىت كۇتەتىن جاندار قانشاما؟! ماڭدايىنا جازىلعان تاعدىردان قاشىپ، قۇتىلا الماسىن بىلسە دە، ومىردەن ءوز ورنىن تاۋىپ، ەشكىمگە ماسىل بولماي ءوز كۇنىن ءوزى كورىپ جۇرگەن جاندار بارشامىزعا ۇلگى. سولاردىڭ ءبىرى — باتىس قازاقستان وبلىسىنىڭ جانىبەك اۋىلىندا تۇراتىن قانتىم عۇماروۆا.

ومىرگە عاشىق ايەل مۇگەدەكتىگىنە قاراماستان، تىگىنشىلىك جانە قولونەرمەن اينالىسىپ، كاسىبىن دومالاتىپ وتىر. «ادىرنا» ءتىلشىسى قايسار جانمەن تىلدەسىپ، از-كەم اڭگىمە قۇردى.

عۇماروۆا قانتىم امانقىزى 1955 جىلى جەلتوقسان ايىنىڭ جيىرما التىنشى جۇلدىزىندا باتىس قازاقستان وبلىسى، بوكەي وردا اۋدانى، تەمىرماسين اۋىلدىق وكرۋگىندە دۇنيەگە كەلگەن. قۇرمانعازى سوۆحوزى، سارالجىن اۋىلىندا وقىپ، ءبىلىم الدى.

1966 جىلى 11 جاسىندا جول اپاتىنا تۇسكەن. 1980 جىلدارى جاراقاتى قايتا سىر بەرىپ، دارىگەلەر كومەگىنە جۇگىنگەن قانتىم امانقىزى قاتە ەمدەلۋ سالدارىنان دەرتىن اسقىندىرىپ، ونكولوگيالىق اۋرۋعا شالدىققان. كەيىن ەمىن الماتى قالاسىندا جالعاستىردى. مامانداردىڭ قاتەلەسۋى ناتيجەسىندە سۇيەگى بالقىپ، جىلىك مايى اعىپ كەتكەن. وسىلايشا 2 جىل ەمدەلىپ، ەش ناتيجە بولماعان سوڭ اياعىن كەسۋگە ءماجبۇر بولعان. العاشقى جىلدارى I توپ، كەيىن II توپ مۇگەدەكتىگىنە شىقتى.

كەيىپكەرىمىز بالا كەزىنەن اناسىنان شۇلىق توقىپ، كەستە تىگىپ ۇيرەنگەن. مۇگەدەكتىك العاننان كەيىن ول تىگىنشى بولىپ جۇمىسقا ورنالاسادى. 10 جىلدان كەيىن جانىبەك اۋدانىنا تۇرمىسقا شىعىپ، سول ۋاقىتتان باستاپ قولونەرمەن اينالىسۋدى ءجون كورەدى. جۇمىس ىستەپ جۇرگەن تسەح جۇمىسىن توقتاتقان سوڭ ۇيدە وتىرىپ تىگۋ جانە توقۋ جۇمىستارىمەن اينالىسادى.

2011 جىلى گرانت ارقىلى ءىس ماشينا العان.

«2019 جىلى "Amanat" جانىبەك باستاۋىش پارتياسى مۇمكىندىگى شەكتەۋلى ادامدار اراسىندا وتكەن سايىستا ءى ورىن الدىم. وسىعان وراي ماعان كوپ فۋنكتسيونالدىق ءىس ماشينانى سىيعا تارتتى. قازىرگى تاڭدا كورپە، توسەكشە، كوپشىك، قورجىن، سومكە سىندى دۇنيەلەردى ءوز قولىممەن جاسايمىن. كيىمىن قىسقارتقىسى كەلگەندەر نەمەسە قىز جاساۋىنا تاپسىرىس بەرۋشىلەر ۇيىمە كەلىپ، قىزمەتىمدى تۇتىنادى»،— دەيدى قانتىم امانقىزى.


اڭگىمە بارىسىندا رۋحى بيىك ايەل ءوز جان-سىرىمەن ءبولىستى.

«اياعىمنان كەسىلىپ ساراتوۆتا پروتەز الىپ جاتقان كەزىمدە ەمحانادان قوس قولى جوق ادامدى كورگەندە تاۋبەمە كەلدىم. وعان دەيىن جەر جۇزىندەگى جالعىز مۇگەدەك مەنمىن دەپ ويلايتىن ەدىم»،– دەپ ءتۇسىندىردى ول.

ايتۋىنشا، جۇمىس بارىسىندا ءتۇرلى قيىندىق بولادى.

«اۋىلدا تۇرعاندىقتان، قاجەتتى ماتا مەن جىپكە، تاعى دا باسقا كەرەكتى قۇرالدارعا قول جەتكىزە الماي قالامىن. قالاعا كۇندە بارۋعا مۇمكىندىك جوق. ودان بولەك، قارجىلاي جاعىنان دا قيىندىقتار بولىپ تۇرادى. اۋىلدا ەش كاسىپكەردەن دە، بيلىك تاراپىنان دا ەشقانداي كومەك، قولداۋ بولىپ وتىرعان جوق. قولدان كەلگەنشە الماتىعا جىل سايىن پروتەزگە بارعانىمدا كەرەك-جاراعىمدى الىپ الامىن. قيىندىقسىز ءومىر جوق. سول سەبەپتى، مويىماي باسقا جولدارىن قاراستىرىپ وتىرامىن. اتادان قالعان ۇلاعاتتى سوزدەردى ءجيى وقيمىن. وسىلايشا موتيۆاتسيا الامىن. مىنا ءبىر ولەڭ جولدارى ەرەكشە شابىت بەرەدى:
تاۋبەڭە كەل پەندە بولساڭ ەسى بار،
سابىرسىزدار قادىرسىز بوپ توسىلار.
دۇنيەگە قولىڭ جەتپەي قالعاندا،
قوس قولى جوق پەندەلەردى ەسىڭە ال»،— دەپ قايسار جان اعىنان جارىلدى.

قانتىم امانقىزىنىڭ قولىنان شىققان بۇيىمدار

سۇقبات سوڭىندا قانتىم امانقىزى جاستارعا ءوز-اقىل كەڭەسىن ايتتى.

«ءار ءىستىڭ ءوز قيىندىعى بار. شىدامدى، سابىرلى بولىڭدار. توزىمدىلىك پەن ەڭبەكتىڭ ارقاسىندا بارىنە قول جەتكىزە الاسىڭدار. ۇيالى تەلەفونعا تەلمىرە بەرمەي، جاڭا نارسە ۇيرەنۋگە اسىعىڭدار. بارلىق جاستاردى ەڭبەككە شاقىرامىن!»— دەپ ءسوزىن تۇيىندەدى ول.

قايسار مىنەز قانتىم امانقىزىنىڭ ءومىر جول قاي-قايسىمىزعا دا ساباق بولارى انىق. نەسيەسىز، ءوز ەڭبەگىمەن كاسىبىن دومالاتىپ وتىرعان جانعا شىعارماشىلىق تابىستار تىلەيمىز!

«ادىرنا» ۇلتتىق پورتالى

پىكىرلەر