باتىس قازاقستان وبلىسى، ورال قالاسىندا، «جوعارى ينجەنەرلىك-تەحنولوگيالىق كوللەدجى» بازاسىندا «VETAGROSKILLSHUB» قۇزىرەتتىلىك ورتالىعىنىڭ رەسمي اشىلۋى ءوتتى. جاڭا ورتالىق كاسىبي ءبىلىم بەرۋ مەن ەڭبەك نارىعى اراسىنداعى بايلانىستى كۇشەيتىپ، ايماقتىڭ ەكونوميكالىق الەۋەتىن دامىتۋعا باعىتتالعان ماڭىزدى باستاما بولماق.
ورتالىقتىڭ باستى ماقساتى – حالىقارالىق WorldSkills International ستاندارتتارىنا سايكەس بىلىكتى ماماندار دايارلاۋ ارقىلى ايماقتاعى ءوندىرىس پەن اۋىل شارۋاشىلىعى سالاسىنا سەرپىن بەرۋ.
«VETAGROSKILLSHUB» قۇزىرەتتىلىك ورتالىعى ايماق ەڭبەك نارىعىنا قاجەتتى سۇرانىسقا يە مامانداردى دايارلاۋعا باعىتتالعان. مۇندا ستۋدەنتتەر مەن وندىرىستىك شەبەرلەر WorldSkills حالىقارالىق چەمپيوناتتارىنا دايىندالۋ ءۇشىن ارنايى وقۋ-جاتتىعۋ بازاسىن پايدالانا الادى. سونىمەن قاتار، كوللەدج وقىتۋشىلارى مەن وندىرىستىك وقىتۋ شەبەرلەرىنىڭ بىلىكتىلىگىن ارتتىرۋعا ارنالعان ترەنينگتەر مەن كۋرستار ۇيىمداستىرىلادى. ورتالىق جۇمىسسىز ازاماتتار مەن ماماندىعىن اۋىستىرۋعا نيەتتى ادامدارعا قايتا دايارلاۋ مۇمكىندىگىن ۇسىنادى. جاستار مەن مەكتەپ وقۋشىلارىنا كاسىبي باعدار بەرۋ جۇمىستارى جۇرگىزىلىپ، جۇمىسشى ماماندىقتارىنىڭ بەدەلى كوتەرىلۋدە. وقىتۋ پروتسەسىندە حالىقارالىق ستاندارتتارعا سايكەس وزىق تەحنولوگيالار مەن زاماناۋي ادىستەمەلەر بەلسەندى تۇردە ەنگىزىلەدى.
«VETAGROSKILLSHUB» قۇزىرەتتىلىك ورتالىعى «باتىس قازاقستان يننوۆاتسيالىق-تەحنولوگيالىق ۋنيۆەرسيتەتىنىڭ» اگرارلىق يننوۆاتسيالىق-تەحنولوگيالىق پاركىمەن تىعىز ارىپتەستىك ورناتقان. بۇل سەرىكتەستىك ءبىلىم بەرۋ مازمۇنىن وندىرىسكە جاقىنداتىپ، پراكتيكالىق داعدىلاردى دامىتۋعا جول اشادى.
«VETAGROSKILLSHUB» – بۇل ايماقتىق جانە حالىقارالىق كاسىبي چەمپيوناتتارعا دايىندىق الاڭى، جاڭا تەحنولوگيالاردى سىناقتان وتكىزەتىن وقۋ پلاتفورماسى، سونداي-اق جاستاردىڭ عىلىمي جانە يننوۆاتسيالىق الەۋەتىن ارتتىرۋعا باعىتتالعان ورتالىق. بۇل باستاما ايماقتىڭ الەۋمەتتىك-ەكونوميكالىق دامۋىنا وڭ اسەر ەتىپ، كاسىبي ءبىلىم بەرۋ سالاسىندا جاڭا كەزەڭنىڭ باستالۋىن بىلدىرەدى.
بقو ءبىلىم باسقارماسى ءباسپاسوز قىزمەتى
