"ەلىمىزدەن زاڭسىز شىعارىلعان كاپيتال - قاڭتار وقيعاسى كەزىندە زارداپ شەككەن وتباسىلارعا، ونىڭ ىشىندە ازاماتتارى قازا تاپقان، مەرت بولعان وتباسىلارعا ماتەريالدىق كومەك تۇرىندە ۇيىمداستىرىلۋى كەرەك! ءبىز قارا جامىلىپ وتىرعان وتباسىلاردىڭ جاعدايىن رەتتەستىرۋگە مىندەتتىمىز". بۇل پىكىردى بەلگىلى ادۆوكات ابزال قۇسپان Adyrna.kz ۇلتتىق پورتالىنىڭ تىلشىسىنە بەرگەن سۇحباتىندا ايتتى.
"كەزىندە زاڭسىز شىعارىلعان كاپيتال ەلىمىزگە قايتارىلۋ ۇستىندە. وسى قايتارىلىپ جاتقان قاراجات قايدا، قالاي جۇمسالۋى قاجەتتىلىگى تۋرالى جۋرناليستەر سۇراق قويعان ەكەن. مەنىڭ پىكىرىم - بۇل قاراجات ەڭ ءبىرىنشى كەزەكتە مىنا بيىلعى قاڭتار وقيعاسى كەزىندە زارداپ شەككەن وتباسىلارعا، ونىڭ ىشىندە ازاماتتارى قازا تاپقان، مەرت بولعان وتباسىلارعا ماتەريالدىق كومەك تۇرىندە ۇيىمداستىرىلۋى كەرەك دەپ ەسەپتەيمىن. ويتكەنى، قر كونستيتۋتسياسىنىڭ 1-بابىندا "مەملەكەتتىڭ ەڭ باستى قازىناسى - ادام جانە ونىڭ ءومىرى" دەپ كورسەتىلگەن. ەندەشە مەملەكەت ءوزىنىڭ ازاماتتارى الدىنداعى جاۋاپكەرشىلىگىن تەرەڭ سەزىنە وتىرىپ، سول قازا تاپقان ازاماتتاردىڭ كىناسىنىڭ بار نەمەسە جوق بولۋىنا قاراماستان ولاردىڭ ارتىندا قالعان وتباسىلارىنا، وتباسى مۇشەلەرىنە كومەك كورسەتۋگە ءتيىس", - دەيدى ابزال قۇسپان.
ادۆوكاتتىڭ ايتۋىنشا، مەملەكەت بارىنەن بۇرىن قاندى قاڭتاردا ازاماتتارىنان ايىرىلىپ، قايعى قۇشىپ، قان جۇتقان وتباسىلاردىڭ جاعدايىن رەتتەستىرۋى كەرەك.
"ارينە، كەيبىر ازاماتتارىمىز "قازىرگى مىناۋ دۇنيەجۇزىلىك ازىق-تۇلىك تاپشىلىعى جاعدايىندا ءوزىمىزدىڭ وتاندىق ءوندىرىستى دامىتۋعا، ياعني ەكونوميكانىڭ ناقتى سەكتورىنا جۇمساۋ قاجەت" دەپ ايتىپ جاتىر. ول پىكىرلەردى مەن قولدايمىن، قۋاتتايمىن! بىراق، ءار نارسەنىڭ ءوزىنىڭ كەزەكتىلىگى، رەتتىلىگى تۇرعىسىنان كەلەتىن بولساق، ءدال قازىرگى ەڭ باستى قۇندىلىعىمىز بولىپ تابىلاتىن ازاماتتارىمىزدىڭ قارا جامىلىپ وتىرعان وتباسىلارىنىڭ جاعدايىن رەتتەستىرۋگە ءبىز مىندەتتىمىز! ودان ارتىلىپ قالعان قاراجات - ەكونوميكاعا نەمەسە ەلىمىزدەگى باسقا دا الەۋمەتتىك از قامتىلعان توپتارعا جاراتىلىپ جاتسا ءجون بولار ەدى", - دەيدى ادۆوكات.
زارينا اشىربەك،
"ادىرنا" ۇلتتىق پورتالى
