Air Astana اۋەكومپانياسى الماتىدان شىمكەنتكە بەلگىلەنگەن ۋاقىتتان 15 ساعاتقا كەش ۇشقان Fly Arystan رەيسىنىڭ كەشىگۋىنە بايلانىستى جازالاندى. بۇل تۋرالى يندۋستريا جانە ينفراقۇرىلىمدىق دامۋ مينيسترلىگى ازاماتتىق اۆياتسيا كوميتەتىنىڭ (ااك) باسشىسى تالعات لاستاەۆ مالىمدەدى، - دەپ حابارلايدى "ادىرنا" ءتىلشىسى.
لاستاەۆ قازىرگى ۋاقىتتا ااك قازاقستاننىڭ اۆياتسيا اكىمشىلىگىمەن بىرلەسىپ رەيستەردىڭ كەشىگۋى جانە جولاۋشىلار شاعىمىنا بايلانىستى تەكسەرۋدى جالعاستىرىپ جاتقانىن ايتتى.
"تەرگەۋ بارىسىندا 5 ماۋسىمدا Air Astana كومپانيالار توبىنا كىرەتىن Fly Arystan اۋەتاسىمالداۋشىسىنىڭ الماتى – شىمكەنت باعىتى بويىنشا كس-7105 رەيسى 15 ساعات 10 مينۋتقا كەشىگىپ، ۇشقانى انىقتالدى.
ۇشۋدى كۇتۋ كەزىندە رەيس جولاۋشىلارىنا "اۋە كەڭىستىگىن پايدالانۋ جانە اۆياتسيا قىزمەتى تۋرالى" زاڭنىڭ 86-بابى 1-بولىگىندە كوزدەلگەن قىزمەتتەر، اتاپ ايتقاندا، قوناقۇيدە ورنالاستىرۋ قىزمەتتەرى دۇرىس كورسەتىلمەگەن", - دەدى لاستاەۆ.
ونىڭ ايتۋىنشا، بۇل ءۇشىن 28 شىلدەدە اۋەكومپانياعا قاتىستى اقبتك-ءنىڭ 567-بابى 2-بولىگى بويىنشا اكىمشىلىك قۇقىق بۇزۋشىلىق تۋرالى حاتتاما جاسالىپ، وعان سايكەس اۋەكومپانياعا 1000 اەك كولەمىندە ايىپپۇل سالىنعان، بۇل -3 ميلليون 63 مىڭ تەڭگە.
بۇل - Air Astana-عا 2022 جىلى سالىنعان ءۇشىنشى ايىپپۇل. جالپى بيىل رەيستىڭ كەشىگۋى كەزىندە جولاۋشىلار قۇقىعىن بۇزعانى ءۇشىن كومپانيا جالپى سوماسى 9,189 ميلليون تەڭگەگە اكىمشىلىك جاۋاپكەرشىلىككە تارتىلعان.
"قازىرگى ۋاقىتتا رەيستىڭ كەشىگۋى جانە جولاۋشىلار قۇقىعىن بۇزۋ فاكتىلەرى بويىنشا تەكسەرۋ جۇرگىزىلىپ جاتىر، ەگەر قۇقىقبۇزۋشىلىق فاكتىلەرى انىقتالسا، تاسىمالداۋشىلار قولدانىستاعى زاڭناما بويىنشا جاۋاپكەرشىلىككە تارتىلادى", - دەپ ۋادە بەردى لاستاەۆ.
