Air Astana áýekompanııasy Almatydan Shymkentke belgilengen ýaqyttan 15 saǵatqa kesh ushqan Fly Arystan reısiniń keshigýine baılanysty jazalandy. Bul týraly Indýstrııa jáne ınfraqurylymdyq damý mınıstrligi Azamattyq avıaııa komıtetiniń (AAK) basshysy Talǵat Lastaev málimdedi, - dep habarlaıdy "Adyrna" tilshisi.
Lastaev qazirgi ýaqytta AAK Qazaqstannyń Avıaııa ákimshiligimen birlesip reısterdiń keshigýi jáne jolaýshylar shaǵymyna baılanysty tekserýdi jalǵastyryp jatqanyn aıtty.
"Tergeý barysynda 5 maýsymda Air Astana kompanııalar tobyna kiretin Fly Arystan áýetasymaldaýshysynyń Almaty – Shymkent baǵyty boıynsha KS-7105 reısi 15 saǵat 10 mınýtqa keshigip, ushqany anyqtaldy.
Ushýdy kútý kezinde reıs jolaýshylaryna "Áýe keńistigin paıdalaný jáne avıaııa qyzmeti týraly" Zańnyń 86-baby 1-bóliginde kózdelgen qyzmetter, atap aıtqanda, qonaqúıde ornalastyrý qyzmetteri durys kórsetilmegen", - dedi Lastaev.
Onyń aıtýynsha, bul úshin 28 shildede áýekompanııaǵa qatysty ÁQBtK-niń 567-baby 2-bóligi boıynsha ákimshilik quqyq buzýshylyq týraly hattama jasalyp, oǵan sáıkes áýekompanııaǵa 1000 AEK kóleminde aıyppul salynǵan, bul -3 mıllıon 63 myń teńge.
Bul - Air Astana-ǵa 2022 jyly salynǵan úshinshi aıyppul. Jalpy bıyl reıstiń keshigýi kezinde jolaýshylar quqyǵyn buzǵany úshin kompanııa jalpy somasy 9,189 mıllıon teńgege ákimshilik jaýapkershilikke tartylǵan.
"Qazirgi ýaqytta reıstiń keshigýi jáne jolaýshylar quqyǵyn buzý faktileri boıynsha tekserý júrgizilip jatyr, eger quqyqbuzýshylyq faktileri anyqtalsa, tasymaldaýshylar qoldanystaǵy zańnama boıynsha jaýapkershilikke tartylady", - dep ýáde berdi Lastaev.
