استراحان اۋدانىندا جىلدىڭ العاشقى ءتورت ايىنداعى الەۋمەتتىك-ەكونوميكالىق دامۋ كورسەتكىشى ايتارلىقتاي ارتقان. بۇل تۋرالى اۋدان اكىمى بريفينگ بارىسىندا ءمالىم ەتتى، دەپ حابارلايدى وڭىرلىك كوممۋنيكاتسيالار قىزمەتىنەن.
بيىل اۋدان ونەركاسىبى 1909,6 ملن تەڭگەنىڭ ءونىمىن ءوندىرىپ، ناقتى كولەم يندەكسى (نكي) 123% قۇرادى. بۇل كورسەتكىش اۋدان كاسىپورىندارىنىڭ تولىق جۇكتەمەمەن جۇمىس ىستەۋىنىڭ ناتيجەسى. اتاپ ايتقاندا، «ميللحاۋز» جشس ۇن مەن كەبەك ءوندىرىسىن، «AZAM KC» جشس استىق كەپتىرۋ جابدىقتارىن شىعارۋدى ۇلعايتقان.
ينۆەستيتسيالىق بەلسەندىلىك تە ايتارلىقتاي ارتىپ وتىر – نەگىزگى كاپيتالعا تارتىلعان ينۆەستيتسيا كولەمى 2,6 ملرد تەڭگەدەن استى، بۇل وتكەن جىلدىڭ سايكەس كەزەڭىمەن سالىستىرعاندا ەكى ەسەدەن كوپ.
«اۋىل شارۋاشىلىعى ونىمدەرىنىڭ جالپى كولەمى 2290,9 ملن تەڭگەنى قۇراپ، وتكەن جىلمەن سالىستىرعاندا تومەندەگەنىمەن، ناقتى كولەم يندەكسى 104,2%-دى كورسەتتى. بۇل – ءوندىرىس كولەمىنىڭ قىسقارۋىنا قاراماستان، ءونىم قۇرىلىمىنىڭ تيىمدىلىگىن ساقتاپ قالعانىن بىلدىرەدى. اۋدان بويىنشا جازدىق ەگىس كولەمى 390,5 مىڭ گەكتارعا جەتكەن»، دەدى سپيكەر.
قۇرىلىس جۇمىستارىنىڭ كولەمى 683,7 ملن تەڭگەنى قۇراپ، نكي 444,9%-عا جەتتى. بولشەك ساۋدا اينالىمى 2054,3 ملن تەڭگەنى قۇراپ، 135,8% ءوسىم كورسەتكەن.
اۋداندا تىركەلگەن كاسىپكەرلىك سۋبەكتىلەرىنىڭ سانى 1319 بىرلىككە جەتسە، ونىڭ ىشىندە بەلسەندى جۇمىس ىستەيتىندەرى – 1227. وتكەن جىلى 3 ءىرى ينۆەستيتسيالىق جوبا جۇزەگە اسىرىلىپ، 29 جاڭا جۇمىس ورنى اشىلدى.
كوكتەمگى قار سۋىنىڭ اسەرىنەن كولۋتون، ياگودنوە جانە جاڭا-تۇرمىس اۋىلدارىنداعى بىرنەشە ءۇي سۋ استىندا قالدى. اۋدان اۋماعىندا جەرگىلىكتى سيپاتتاعى توتەنشە جاعداي جاريالانىپ، 62 تۇرعىنعا جالپى سوماسى 255,2 ملن تەڭگە كولەمىندە كومەك كورسەتىلدى.
«وڭىرلەردى دامىتۋدىڭ ۇلتتىق جوباسى اياسىندا بىرقاتار ەلدى مەكەندەردە سۋ قۇبىرلارى مەن تازارتۋ قوندىرعىلارى سالىنىپ جاتىر. ستارىي كولۋتون اۋىلىندا 339 ملن تەڭگەگە دارىگەرلىك امبۋلاتوريا قۇرىلىسى اياقتالۋدا»، دەپ قوستى اۋدان اكىمى تالعات ەرسەيىتوۆ.
اۋداندا مەديتسينا سالاسىندا كادر تاپشىلىعى بايقالادى. 7 دارىگەر جەتىسپەيدى. بۇل ماسەلەنى شەشۋ ءۇشىن 5 ستۋدەنت اۋدان اكىمىنىڭ گرانتىمەن مەديتسينا ۋنيۆەرسيتەتىندە ءبىلىم الۋدا.
اۋداندا 31 مەكتەپتە 3391 وقۋشى ءبىلىم الادى. دەگەنمەن، ماتەماتيكا، قازاق ءتىلى مەن ادەبيەتى، اعىلشىن ءتىلى پاندەرى بويىنشا مۇعالىم تاپشىلىعى وتكىر تۇر. كامىشەنكا مەن جاڭا-تۇرمىس اۋىلدارىنداعى مەكتەپتەردە كۇردەلى جوندەۋ جۇرگىزىلۋدە.
جۇمىسپەن قامتۋ باعىتىندا بيىل 176 ادام جۇمىسقا ورنالاستىرىلعان. جۇمىسسىزدىق دەڭگەيى – 1,8%.
نوۆوچەركاسسك اۋىلىندا سپورت زالى بار جاڭا مادەنيەت ءۇيىنىڭ قۇرىلىسى باستالدى. جوبا قۇنى – 1,2 ملرد تەڭگە. سونىمەن قاتار پەرۆوماي اۋىلىندا دا مادەنيەت نىسانى سالىنۋدا.
قورىتىندىلاي كەلە، اۋدان اكىمى تالعات ەرسەيىتوۆ ەل پرەزيدەنتى قويعان 2029 جىلعا دەيىنگى ەكونوميكالىق ماقساتتارعا جەتۋ ءۇشىن اۋدان جۇيەلى تۇردە جۇمىس جۇرگىزىپ جاتقانىن اتاپ ءوتتى.
