اقمولا وبلىسىندا تۋريزم سالاسى سوڭعى جىلدارى تۇراقتى ءوسىم تراەكتورياسىنا ءتۇستى. وتكەن جىلدىڭ قورىتىندىسى جانە بيىلعى جىلدىڭ ءبىرىنشى توقسانىنداعى ءوڭىردىڭ تۋريستىك الەۋەتى تەك ىشكى سۇرانىس ەسەبىنەن عانا ەمەس، حالىقارالىق دەڭگەيدە دە كەڭەيىپ كەلە جاتقانىن ايعاقتايدى. سالاداعى جۇيەلى جۇمىستار، ينفراقۇرىلىمدىق سەرپىلىس پەن ينۆەستيتسيالىق بەلسەندىلىك ءوڭىردى ەل ءتۋريزمىنىڭ نەگىزگى تىرەكتەرىنىڭ بىرىنە اينالدىرىپ وتىر.
تۋريستىك اعىن – قارقىن ۇستىندە
2025 جىلدىڭ قورىتىندىسىندا وبلىسقا كەلگەن تۋريستەردىڭ جالپى سانى 1 ملن 623 مىڭ ادامعا جەتتى. ونىڭ ىشىندە ورنالاستىرۋ ورىندارىندا ءبىر تاۋلىكتەن استام توقتاعان تۋريستەر سانى 530,4 مىڭ ادامدى قۇراپ، وتكەن جىلدىڭ سايكەس كەزەڭىمەن سالىستىرعاندا 26 پايىزعا ارتتى. بۇل – وڭىردەگى تۋريستىك قىزمەت ساپاسىنىڭ جاقسارىپ، دەمالۋشىلاردىڭ ۇزاق مەرزىمگە كەلۋ ءۇردىسىنىڭ قالىپتاسقانىن كورسەتەدى.
سالىستىرمالى تۇردە العاندا، 2022 جىلى بۇل كورسەتكىش 443,2 مىڭ ادام بولسا، 2023 جىلى 504,5 مىڭعا دەيىن وسكەن. دەمەك، سوڭعى ءۇش جىلدا تۋريزم سالاسى كەزەڭ-كەزەڭىمەن ىلگەرىلەپ، تۇراقتى ءوسىم ديناميكاسىن قالىپتاستىردى.
قىزمەت كولەمى مەن سالىق ءتۇسىمى ارتتى
2025 جىلدىڭ توعىز ايىندا ورنالاستىرۋ ورىندارى كورسەتكەن قىزمەت كولەمى 26,3 ملرد تەڭگەگە جەتىپ، وتكەن جىلدىڭ سايكەس كەزەڭىنەن 22 پايىزعا جوعارىلادى. بۇل ءوسىم، ەڭ الدىمەن، تۋريستەر سانىنىڭ ارتۋىمەن جانە كۋرورتتىق ايماقتارداعى قىزمەت قۇنىنىڭ وسۋىمەن بايلانىستى.
سالاداعى ەكونوميكالىق بەلسەندىلىكتىڭ ارتۋى بيۋدجەت كىرىسىنە دە وڭ اسەرىن تيگىزدى. اتالعان كەزەڭدە تۋريزمنەن تۇسكەن سالىق تۇسىمدەرى 3,1 ملرد تەڭگەنى قۇراپ، وتكەن جىلمەن سالىستىرعاندا 15 پايىزعا كوبەيدى. جالپى، سوڭعى جىلدارى بۇل كورسەتكىش تە تۇراقتى ءوسىپ كەلەدى: 2022 جىلى – 2,7 ملرد تەڭگە، 2023 جىلى – 3,5 ملرد، 2024 جىلى – 4,5 ملرد تەڭگە.
ىشكى تۋريزم – نەگىزگى قوزعاۋشى كۇش
وڭىردەگى تۋريستىك اعىمنىڭ 98 پايىزىن ىشكى تۋريزم قۇرايدى. بۇل – اقمولا وبلىسىنىڭ، اسىرەسە، ەلوردالىق ايماققا جاقىن ورنالاسۋىنىڭ تيىمدىلىگىن ايقىن كورسەتەدى.
تۋريستەردىڭ نەگىزگى لەگى ششۋچينسك-بۋراباي كۋرورتتىق ايماعىنا تيەسىلى. 2025 جىلدىڭ توعىز ايىندا بۇل اۋماققا 1,4 ملن-نان استام ادام كەلگەن. ونىڭ ىشىندە «بۋراباي» ۇلتتىق پاركىنىڭ وزىنە 1 ملن-نان استام كەلۋشى تىركەلگەن.
سونىمەن قاتار، شەتەلدىك تۋريستەر سانى دا ءوسىم كورسەتۋدە. 2025 جىلدىڭ توعىز ايىندا وڭىرگە 19,6 مىڭ شەتەلدىك قوناق كەلىپ، وتكەن جىلمەن سالىستىرعاندا 27 پايىزعا ارتقان. نەگىزگى تۋريستىك نارىقتاردى رەسەي، قىتاي، وزبەكستان، گەرمانيا، اقش، ۇلىبريتانيا، تۇركيا جانە ءۇندىستان ەلدەرى قۇرايدى.
ينۆەستيتسيا – دامۋدىڭ تىرەگى
2025 جىلى تۋريزم سالاسىنا تارتىلعان ينۆەستيتسيا كولەمى 35,2 ملرد تەڭگەگە جەتىپ، وتكەن جىلمەن سالىستىرعاندا 42 پايىزعا ارتتى. ونىڭ ىشىندە 12,4 ملرد تەڭگە – جەكە ينۆەستيتسيالار.
وڭىردە بىرقاتار ءىرى جوبالار جۇزەگە اسىرىلدى. اتاپ ايتقاندا، ماكينسك قالاسىندا جاڭا قوناقۇي كەشەنى سالىنسا، بۋراباي، ارشالى جانە شورتاندى اۋداندارىندا دەمالىس ايماقتارى جاڭارتىلىپ، قايتا جاڭعىرتىلدى. بۇل جوبالار تۋريستەرگە قولايلى جاعداي جاساپ قانا قويماي، ءوڭىر ەكونوميكاسىنا قوسىمشا سەرپىن بەرىپ وتىر.
ينفراقۇرىلىم جاڭارىپ، تۋريستىك ورتا قالىپتاسۋدا
2025 جىلى بۋراباي كۋرورتتىق ايماعىندا اۋقىمدى ينفراقۇرىلىمدىق جۇمىستار جۇرگىزىلدى. جاڭا باقىلاۋ الاڭدارى سالىنىپ، تۋريستىك سوقپاقتار جاڭارتىلدى، ۆەلوسيپەد جولدارى توسەلدى. سونىمەن قاتار، قوعامدىق جاعاجايلار، اۆتوتۇراقتار مەن سانيتارلىق نىساندار ىسكە قوسىلدى.
ەلوردا مەن بۋراباي اراسىنداعى جىلدام ەلەكتر پويىزىنىڭ ىسكە قوسىلۋى تۋريستەر اعىنىن ارتتىرۋعا مۇمكىندىك بەردى. بۇدان بولەك، العاش رەت تىكۇشاقپەن ەكسكۋرسيالىق تۋرلار ۇيىمداستىرىلدى.
زەرەندى ايماعىندا زاماناۋي ۆيزيت-ورتالىقتىڭ قۇرىلىسى باستالدى. ال ەلوردا ماڭىندا ەكوپاركتەر قۇرۋ باستاماسى قولعا الىنىپ، بۇل جوبا تۋريستىك جۇكتەمەنى تەڭگەرۋگە باعىتتالعان.
حالىقارالىق ىلگەرىلەتۋ جانە وقيعالىق تۋريزم
ءوڭىردىڭ تۋريستىك الەۋەتىن ىلگەرىلەتۋ ماقساتىندا 2025 جىلى اقمولا وبلىسى حالىقارالىق كورمەلەرگە قاتىسىپ، شەتەلدىك تۋروپەراتورلارعا ارنالعان اقپاراتتىق تۋرلار ۇيىمداستىردى. ناتيجەسىندە مىڭنان استام شەتەلدىك تۋريست ارنايى تۋرپاكەتتەر ارقىلى وڭىرگە كەلگەن.
جىل بويى 25 ءىرى ءىس-شارا وتكىزىلىپ، ولاردىڭ قاتارىندا حالىقارالىق فەستيۆالدەر مەن سپورتتىق جارىستار بار. بۇل شارالار ءوڭىردىڭ تانىمالدىلىعىن ارتتىرىپ، وقيعالىق ءتۋريزمدى دامىتۋعا ىقپال ەتتى.
2026 جىل: جاڭا بەلەستەر مەن ءىرى جوبالار
الداعى كەزەڭگە قويىلعان ماقساتتار دا اۋقىمدى. 2026 جىلى تۋريستەر سانىن 1,8 ملن ادامعا جەتكىزۋ، ونىڭ ىشىندە 650 مىڭ ءتۋريستى ورنالاستىرۋ ورىندارىندا قابىلداۋ جوسپارلانىپ وتىر. شەتەلدىك تۋريستەر سانىن 50 مىڭعا دەيىن ارتتىرۋ كوزدەلگەن.
بۋراباي ايماعىندا حالىقارالىق برەندتەرمەن بىرلەسكەن ءىرى قوناقۇي جوبالارى جۇزەگە اسىرىلماق. ولاردىڭ قاتارىندا الەمدىك جەلىلەرگە تيەسىلى قوناقۇيلەر مەن دەمالىس كەشەندەرى بار. سونىمەن بىرگە، جاڭا تۋريستىك مارشرۋتتار اشىلىپ، زاماناۋي ۆيزيت-ورتالىقتار سالىنادى.
ەلوردا ماڭىنداعى اۋدانداردا ەكوتۋريزم، اگروتۋريزم جانە دەمالىس كۇنگى تۋريزم باعىتتارى دامىتىلىپ، جاڭا تۋريستىك كەڭىستىكتەر قالىپتاسادى.
تءۇيىن
جالپى العاندا، اقمولا وبلىسىنىڭ تۋريزم سالاسى ساپالىق جاڭا كەزەڭگە قادام باستى دەۋگە تولىق نەگىز بار. ينفراقۇرىلىمنىڭ جاڭارۋى، ينۆەستيتسيالىق تارتىمدىلىقتىڭ ارتۋى جانە جۇيەلى مەملەكەتتىك قولداۋ ءوڭىردى ورتالىق ازياداعى جەتەكشى تۋريستىك باعىتتاردىڭ بىرىنە اينالدىرۋعا مۇمكىندىك بەرەدى.
