كوكشەتاۋدا مەدياتسيا كۇنىنە وراي اقمولا وبلىسى مەدياتسيا كەڭەسىنىڭ كەڭەيتىلگەن وتىرىسى ءوتتى. جيىندا مەدياتسيانىڭ قوعامداعى ءرولى، داۋلاردى بەيبىت جولمەن شەشۋ جانە ەتنوسارالىق كەلىسىمدى نىعايتۋ ماسەلەلەرى تالقىلاندى.
جيىندى اشقان «قوعامدىق كەلىسىم» كمم باسشىسى قۋانىش شاقشاقوۆ مەدياتسيانىڭ قوعام تۇراقتىلىعىن قامتاماسىز ەتۋدەگى ماڭىزىن اتاپ ءوتتى. ونىڭ ايتۋىنشا، كەلىسىم – كوپەتنوستى قوعامداعى سەنىم مەن ءوزارا قۇرمەتتىڭ نەگىزى.
اقمولا وبلىسى ىشكى ساياسات باسقارماسى باسشىسىنىڭ ورىنباسارى سابىرحان كەنجەباەۆ مەدياتسيانى تەك داۋدى شەشۋ قۇرالى ەمەس، قوعامداعى قارىم-قاتىناستى رەتتەيتىن ماڭىزدى تەتىك رەتىندە باعالادى. ونىڭ سوزىنشە، داۋدى ۋشىقتىرماي، دەر كەزىندە شەشۋ – وركەنيەتتى قوعامنىڭ بەلگىسى.
كەڭەس توراعاسى گۇلنار ماديەۆا وڭىردەگى مەدياتسيا جۇمىسىنا توقتالدى. قازىرگى تاڭدا وبلىستا 18 مەدياتسيا الاڭى جۇمىس ىستەيدى. وندا 10 مەدياتور، ونىڭ ىشىندە 6 كاسىبي جانە 4 قوعامدىق مەدياتور قىزمەت كورسەتەدى.
جىل بويى «ەلدەسۋ جانە تىلدەسۋ» جوباسى اياسىندا كاسىپورىندار مەن ءبىلىم بەرۋ ۇيىمدارىندا كەزدەسۋلەر وتكىزىلگەن. اتاپ ايتقاندا، «Kazrost Engineering Ltd»، «گورمولزاۆود»، «قازپوشتا» سياقتى ۇيىمداردا كەلىسىم مادەنيەتىن ناسيحاتتاۋعا باعىتتالعان شارالار ۇيىمداستىرىلعان.
كەڭەس مۇشەلەرى گەريحان يانديەۆ، قانات شەگەتاەۆ، گۇلميرا ەشانوۆا مەدياتسيانىڭ قىلمىستىق ىستەردەن باستاپ اتقارۋشىلىق ءوندىرىس كەزەڭىنە دەيىن قولدانىلىپ جاتقانىن اتاپ ءوتتى. سونداي-اق ولار ەتنوسارالىق قاتىناستارداعى تۇسىنىسپەۋشىلىكتەردىڭ الدىن الۋدا مەدياتسيانىڭ ءرولى جوعارى ەكەنىن جەتكىزدى.
اقساقالدار كەڭەسىنىڭ مۇشەسى بولات زاكەنوۆ كەلىسىم مادەنيەتىن قالىپتاستىرۋ قوعام ءۇشىن ماڭىزدى مىندەت ەكەنىن ايتتى. ونىڭ پىكىرىنشە، تۇسىنىستىك – تۇراقتىلىقتىڭ نەگىزى.
جيىن قورىتىندىسىندا مەدياتسيا ينستيتۋتىن دامىتۋ جانە الدىن الۋ جۇمىستارىن كۇشەيتۋ بويىنشا ۇسىنىستار ايتىلدى.
ساراپشىلاردىڭ پىكىرىنشە، بۇگىنگى قوعامدا مەدياتسيا تەك قۇقىقتىق قۇرال ەمەس، ول – قوعامدىق كەلىسىمدى نىعايتۋدىڭ ءتيىمدى ءتاسىلى. سەبەبى قازىرگى ۋاقىتتا قوعامعا ەڭ قاجەتتىسى – داۋ ەمەس، ديالوگ.
