بيىل 30 ماۋسىمنان باستاپ 2026 جىلعى 30 ماۋسىمعا دەيىن رەسەي فەدەراتسياسىنىڭ مەملەكەتتىك شەكاراسىنداعى وتكىزۋ بەكەتتەرىندە شەتەل ازاماتتارى مەن ازاماتتىعى جوق تۇلعالاردىڭ ەلگە كىرۋى مەن شىعۋى بويىنشا جاڭا ەرەجەلەردى سىناقتان وتكىزۋ جوباسى ىسكە قوسىلادى، دەپ حابارلايدى "ادىرنا".
جاڭا تارتىپكە سايكەس، ۆيزاسىز رەجيم اياسىندا رەسەيگە بارۋدى جوسپارلاعان شەتەل ازاماتتارىنا «ruID» ءموبيلدى قوسىمشاسى ارقىلى الدىن الا تىركەۋدەن ءوتۋ ۇسىنىلادى. بۇل قادام مىندەتتى ەمەس، بىراق ەلەكتروندى ءوتىنىشتى تولتىرۋ شەتەل ازاماتتارىنا بىرقاتار ارتىقشىلىق بەرەدى.
جاڭا ەرەجە قازاقستان ازاماتتارىنا قالاي اسەر ەتەدى؟
قازاقستان مەن رەسەي اراسىنداعى ۆيزاسىز قاتىناس ءتارتىبى وزگەرمەيدى. «ruID» قوسىمشاسى ارقىلى ءوتىنىش بەرۋ – ەرىكتى سيپاتتا. الايدا رەسەيلىك مەملەكەتتىك قىزمەتتەرگە، ۇيالى بايلانىس وپەراتورلارىنىڭ قىزمەتتەرىنە جانە تولەم جۇيەلەرىنە وڭاي قول جەتكىزۋ ءۇشىن قوسىمشانى پايدالانۋ ۇسىنىلادى.
قوسىمشامەن تىركەلۋ ءتارتىبى
ءوتىنىش جوسپارلانعان ساپاردان 90 كۇن بۇرىن نەمەسە ساپارعا دەيىن كەمىندە 72 ساعات قالعاندا بەرىلۋى ءتيىس.
اسا ماڭىزدى جاعدايلاردا (مىسالى، تۋىستىڭ قايتىس بولۋى) ءوتىنىش 4 ساعات ىشىندە قابىلدانادى.
وتىنىشتە بارۋ ماقساتى، ساپار مەرزىمى، ەلدەن شىعۋ دەرەكتەرى، بالالار تۋرالى مالىمەتتەر كورسەتىلەدى.
قوسىمشادا بيومەتريكالىق مالىمەتتەر: بەت-الپەت سۋرەتى، پاسپورت جانە داۋىس جازباسى ۇسىنىلادى.
رەسەيگە كىرگەننەن كەيىن نە ىستەۋ كەرەك؟
شەكارادان وتكەن سوڭ 10 كۇن ىشىندە جالپى بيومەتريكالىق جۇيەگە (ەبس) تىركەلۋ قاجەت. بۇل ءۇشىن جاقىن ورنالاسقان بانكتىڭ بولىمشەسىنە بارىپ، جەكە باس قۇجاتتارىن كورسەتۋ قاجەت.
سونداي-اق، رەسەيلىك «گوسۋسلۋگي» پورتالىندا اككاۋنتتى راستاۋ ءۇشىن كوپفۋنكتسيونالدى ورتالىقتارعا (مفتس) بارۋ ۇسىنىلادى.
بۇل ارقىلى:
- مەملەكەتتىك قىزمەتتەردى ونلاين الۋعا;
- رەسەيلىك SIM-كارتا راسىمدەۋگە;
- ايىپپۇلدار مەن الىمداردى تولەۋگە بولادى.
