ZTB جوباسىنىڭ نەگىزىن قالاۋشى مارعۇلان تۇرسىنوۆ الەۋمەتتىك جەلىدە جازعان پىكىرى ارقىلى قوعامدا ۇلكەن داۋ تۋعىزدى. Threads پاراقشاسىندا ول ەلىمىزدەگى ورىستاردى «الدەقايدا ءبىلىمدى، جاۋاپتى جانە تۇراقتى» دەپ اتاعان بولاتىن، دەپ حابارلايدى “ادىرنا”.
ء«بىزدىڭ ەلدە ورىستارعا قاتىستى ۇلتشىلدىق بايقالادى. مەن كوپ جاعدايدا ولارعا جۇگىنەمىن. ويتكەنى مەن ولاردى الدەقايدا ءبىلىمدى، جاۋاپتى ءارى تۇراقتى دەپ سانايمىن»، – دەپ جازدى تۇرسىنوۆ.
بۇل مالىمدەمە جەلى قولدانۋشىلارى تاراپىنان تەرىس قابىلداندى. كوپشىلىك ونى «قۇلدىق سانا كورىنىسى»، «ۇلتتى كەمسىتۋ» دەپ باعالاپ، اشىق سىنعا الدى.
«وزىمىزگە باعا بەرۋ ءۇشىن بىرەۋدى اسپانداتىپ، ءوزىمىزدى جەرگە ۇرۋدىڭ كەرەگى جوق. تاعى ونى ورىس تىلىندە جازدىڭىز. جانىڭىز اشىسا، قازاقشا جازىڭىز»، – دەپ پىكىر قالدىردى بەوسەندى قولدانۋشىنىڭ ءبىرى.
قوعامنىڭ رەاكتسياسى مەن سىننان كەيىن مارعۇلان تۇرسىنوۆ اتالعان جازباسىن ءوشىرىپ تاستاپ، كەشىرىم سۇراعان. الايدا، كوپ ۇزاماي كەشىرىم سۇراعان جازباسى دا جەلىدەن جوعالىپ كەتكەن.
بۇل وقيعا تەك جەلىدەگى پىكىرتالاسپەن شەكتەلمەي، زاڭ اياسىندا جاۋاپكەرشىلىك ماسەلەسىنە دە ۇلاستى. بەلگىلى PR مامانى ايبار ولجاي تۇرسىنوۆتىڭ جازباسىنداعى «ولار الدەقايدا ءبىلىمدى، جاۋاپتى جانە تۇراقتى» دەگەن تىركەستى “ۇلتتىق ارازدىقتى قوزدىرۋ” دەپ باعالاپ، قازاقستان رەسپۋبليكاسى قىلمىستىق كودەكسىنىڭ 174-بابىن بۇزۋ مۇمكىندىگىنە نازار اۋداردى. ءتيىستى تۇلعا وسى ماسەلەگە بايلانىستى باس پروكۋراتۋراعا رەسمي ارىز جولداعانىن مالىمدەدى.
«ZTB پابليگىنىڭ يەسى مارعۇلان تۇرسىنوۆ جازعان پىكىر — ءبىر ۇلتتى ءبىر ۇلتتان جوعارى قويۋ. بۇل — "اريلىك راسانىڭ ۇستەمدىگى" دەگەن فاشيستىك يدەولوگياعا ۇقساس. سول سەبەپتى باس پروكۋراتۋراعا ماتەريالداردى تىركەپ، ارىز ءتۇسىردىم. پروكۋراتۋرا ءوز تاراپىنان تەكسەرىس جۇرگىزەدى نەمەسە ىشكى ىستەر مينيسترلىگىنە جولدايدى».
قازىرگى ۋاقىتتا بۇل ءىس بويىنشا رەسمي ورگاندار تاراپىنان قانداي دا ءبىر مالىمدەمە جاسالعان جوق. قوعام بەلسەندىلەرى مەن جەلى قولدانۋشىلارى بۇل ماسەلەنى ءجىتى باقىلاپ وتىر.
