قازاقستاندىق پويىزداردىڭ بارلىعىندا دەرلىك بەينەكامەرالار ورناتىلادى. بۇل تۋرالى KTK تەلەارناسى جاريالادى، دەپ حابارلايدى “ادىرنا”.
اقپاراتقا سايكەس، بەينەباقىلاۋ كامەرالارى قۇقىقبۇزۋشىلىقتاردىڭ سانىن ازايتىپ، جولاۋشىلار ۇمىتىپ كەتكەن زاتتاردى تابۋعا كومەكتەسەدى. قازىردىڭ وزىندە ءتورت مىڭ كامەرا ورناتىلعان. جىل سوڭىنا دەيىن بارلىق 112 باعىتتاعى پويىزداردى تولىق بەينەكامەرالارمەن جابدىقتاۋ جوسپارلانعان.
مامانداردىڭ ايتۋىنشا، بەينەباقىلاۋ كامەرالارىنداعى جازبالار سيتۋاتسيالىق ورتالىقتا مۇقيات باقىلانادى. ۆاگوندارداعى ۆيدەولار ناقتى ۋاقىت رەجيمىندە تاراتىلادى. بۇل ستاندارتتى ەمەس جاعدايلارعا دەر كەزىندە ارەكەت ەتۋگە كومەكتەسەدى. "قازاقستان تەمىر جولى" وكىلدەرى بەينەباقىلاۋ جاقىندا پايدا بولعانىنا قاراماستان، پويىزدارداعى ءتارتىپ بۇزۋشىلىق دەڭگەيى قازىردىڭ وزىندە 21% تومەندەگەنىن اتاپ ءوتتى. شاعىمدار سانى دا ۇشتەن بىرگە ازايعان. ال ۇمىتىلعان ءاربىر توعىزىنشى زات يەلەرىنە قايتارىلعان. ال جاڭا ۆاگوندار بەينەباقىلاۋ جۇيەسىمەن جابدىقتالعان كۇيدە كەلىپ جاتىر ەكەن.
"بەينەاناليتيكالىق جۇيەنىڭ كومەگىمەن پويىزدارداعى ءتۇتىن، بۇزاقىلىق، بەت-الپەتتى تانۋ سياقتى ەرەكشە جاعدايلاردى انىقتاي الامىز. بۇل ءبىرىنشى كەزەكتە جولاۋشىلاردىڭ جايلىلىعىنا، ولاردىڭ قاۋىپسىزدىگىنە باعىتتالعان", – "جولاۋشىلار تاسىمالى" اق باسقارما توراعاسىنىڭ ورىنباسارى مۇرات تورەگەلدين.
