ەكى جاڭا مينيسترلىكتى جاساقتاۋ جۇمىستارى اياقتالىپ قالدى. بۇل تۋرالى عىلىم جانە جوعارى ءبىلىم ءمينيسترى ساياسات نۇربەك ءوزىنىڭ فەيسبۋك پاراقشاسىندا جازدى، دەپ حابارلايدى "ادىرنا" ۇلتتىق پورتالى.
"ەكى جاڭا مينيسترلىكتى جاساقتاۋ جۇمىستارى اياقتالىپ قالدى. ارينە ءبىر مەكەمەنى ەكىگە ءبولۋ زاڭدىق تۇرعىدان دا، ادامگەرشىلىك جاعىنان دا وڭاي شارۋا ەمەس. مەملەكەتتىك ورگاندى جاڭادان قۇرۋدى ايتپاعاندا، كەيدە ءتىپتى شاعىن بولىمشەنىڭ مىندەتتەرىن ءبولۋدىڭ ءوزى قيىنعا سوعادى. ۇزاق جىلدار بويى ءبىر كابينەتتە، ءبىر ۇستەل باسىندا جۇمىس ىستەپ وتىرعان ماماندارىمىز وسى كۇندەرى ەكى جاققا قاتار قىزمەت ەتۋگە ءماجبۇر. اسحات ايماعامبەتوۆ باسقارعان بۇرىنعى ءبىلىم جانە عىلىم مينيسترلىگىنىڭ ۇجىمى جوعارعى ءبىلىم بەرۋ جۇيەسىن رەفورمالاۋ، عالىمداردى دايارلاۋ، عىلىمدى دامىتۋ باعىتىندا ۇلكەن جۇمىس اتقاردى", دەدى ساياسات نۇربەك.
اتاپ ايتساق، جوعارعى وقۋ ورىندارى مەن عىلىمي ينستيتۋتتار اكادەميالىق ەركىندىك الدى، دەربەس باسقارۋ تەتىگىنە يە بولدى.
بۇل – زاماناۋي ۋنيۆەرسيتەت قۇرۋ، عىلىمي ينفراسترۋكتۋرانى قالىپتاستىرۋ جانە عالىمدار مەن شاكىرتتەرگە جايلى جاعداي جاساۋدىڭ نەگىزى ەكەنى بەلگىلى. ءبىزدىڭ قازىرگى مىندەتىمىز - ءبىلىم جانە عىلىم مينيسترلىگى باستاپ كەتكەن رەفورمالاردى ودان ءارى جالعاستىرۋ، بۇل سالادا تىڭ وزگەرىستەر ەنگىزۋ. بۇل ىستەردى ەلىمىزدەگى عىلىم مەن جوعارى ءبىلىمدى مودەرنيزاتسيالاۋدىڭ باستاۋىندا تۇرعان ماماندار جالعاستىراتىنى ءبىزدى قۋانتادى. ءبىز مەملەكەتتىك ماڭىزى بار ورتاق جۇمىستى اتقارىپ جاتىرمىز. ويتكەنى كاسىبي دەڭگەيى جوعارى مامان مەن زەرتتەۋشىنىڭ نەگىزى بالا كۇنىنەن قالىپتاسادى",- دەدى مينيستر.
سوندىقتان، بىرلەسە ارەكەت ەتىپ، تۇلعانىڭ قالىپتاسۋى ءۇشىن ءار كەزەڭدە ساپالى ءبىلىم بەرۋدى قامتاماسىز ەتۋىمىز كەرەك.
ء"وز شاكىرتتەرىنىڭ جەتكەن جەتىستىگىنە مەكتەپ مۇعالىمى دە، جوعارعى وقۋ ورنىنىڭ وقىتۋشىسى دا مارقايىپ، ماقتان تۇتاتىنى زاڭدى دەپ ويلايمىن. الداعى ۋاقىتتا وقۋ-اعارتۋ مينيسترلىگى مەن عىلىم جəنە جوعارعى بiلiم مينيسترلىگىنىڭ قالىپتاسۋىنا اتسالىسىپ، بار كۇش-جىگەرى مەن قاجىر-قايراتىن، التىن ۋاقىتىن سارپ ەتكەندەر وسى كۇندەرى اتقارىلعان جۇمىستاردى زور ماقتانىشپەن ەسكە الاتىنىنا سەنىمدىمىن. وسى ورايدا مەملەكەت باسشىسىنا، ۇكىمەت مۇشەلەرى مەن پارلامەنت دەپۋتاتتارىنا بىزگە سەنىم ارتىپ، جاڭا مينيسترلىكتەردى قۇرۋعا قولداۋ بىلدىرگەنى ءۇشىن العىسىمدى ايتقىم كەلەدى. سىزدەردىڭ كەڭەستەرىڭىز، ۇسىنىستارىڭىز بەن كومەكتەرىڭىزدىڭ ارقاسىندا بۇل جۇمىستى ويداعىداي اتقاراتىنىمىز ايقىن. «بىرلەسە كوتەرگەن جۇك جەڭىل» دەمەكشى، تىزە قوسا ەڭبەك ەتكەندە عانا پرەزيدەنتتىڭ تاپسىرماسىن ابىرويمەن ورىنداپ، ۇلتىمىزدىڭ ءال-اۋقاتىن ارتتىراتىنىمىزعا بەك سەنىمدىمىن",- دەپ جازدى ساياسات نۇربەك.
"ادىرنا" ۇلتتىق پورتالى
