ازەربايجاندا رەسەي مەكەمەلەرى ۇيىمداستىرعان بارلىق مادەني ءىس-شارا توقتاتىلدى. بۇل تۋرالى ەلدىڭ مادەنيەت مينيسترلىگى مالىمدەدى، دەپ حابارلايدى «ادىرنا» ءتىلشىسى.
بۇل شەشىمنىڭ قابىلدانۋىنا ەكاتەرينبۋرگ قالاسىندا رەسەيلىك قۇقىق قورعاۋ ورگاندارىنىڭ «ازەربايجان ۇلتى وكىلدەرىنە قارسى ماقساتتى تۇردە جاساعان ارەكەتتەرى» تۇرتكى بولعان. مينيسترلىك مۇنداي وقيعالاردىڭ سوڭعى ۋاقىتتا جۇيەلى سيپاتقا يە بولا باستاعانىن دا اتاپ ءوتتى.
«رەسەيدىڭ مەملەكەتتىك جانە جەكەمەنشىك ۇيىمدارى ۇيىمداستىرعان بارلىق مادەني ءىس-شارا، اتاپ ايتساق، كونتسەرتتەر، فەستيۆالدەر، سپەكتاكلدەر، كورمەلەر مەن وزگە دە مادەني باعدارلامالاردى وتكىزۋ توقتاتىلاتىنىن حابارلايمىز»،—دەپ جازدى مينيسترلىك X الەۋمەتتىك جەلىسىندە.
ەسكە سالايىق، 27 ماۋسىم كۇنى رەسەي قۇقىق ورگاندارى ەكاتەرينبۋرگتە ازەربايجان تۋمالارى تۇراتىن بىرنەشە پاتەرگە رەيد ۇيىمداستىرعان ەدى. ناتيجەسىندە ەكى ازامات قازا تاۋىپ، بىرنەشە ادام اۋىر جارالانىپ، توعىز ادام تۇتقىندالعان.
ازەربايجانداعى ورىس قاۋىمداستىعى رەسەي تاراپىنىڭ ءىس-ارەكەتىن ايىپتاپ، ەكاتەرينبۋرگتە بولعان وقيعانى وبەكتيۆتى تۇردە تەرگەۋ كەرەكتىگىن مالىمدەدى. سونداي-اق جەكەلەگەن بيلىك وكىلدەرىنىڭ جاۋاپسىز ارەكەتتەرى سالدارىنان وداقتاستىق ءارى دوستىق بايلانىسى بار مەملەكەتتەر اراسىنداعى قاتىناستارعا زيان كەلىپ جاتقانى الاڭداتارلىق جايت ەكەنىن اتاپ ءوتتى.
«25 جەلتوقساندا باكۋ-گروزنىي باعىتىمەن ۇشقان ۇشاق اپاتقا ۇشارادى. سول ۋاقىتتان بەرى رەسەيدىڭ رەسمي قۇرىلىمدارىنان كەشىرىم دە، تۇسىنىكتەمە دە بەرىلگەن جوق. مۇنداي ۇنسىزدىك دوستاس مەملەكەتتىڭ ازاماتتارىنىڭ ءومىرى مەن ابىرويىنا دەگەن نەمقۇرايلى كوزقاراس رەتىندە قابىلدانادى»، – دەپ قوستى قاۋىمداستىق.
29 ماۋسىمدا رەسەي ۆيتسە-پرەمەرىنىڭ ازەربايجانعا ساپارى توقتاتىلعانى بەلگىلى بولدى.
