ازەربايجاندا ورىس مەكتەپتەرىنىڭ جابىلاتىنى تۋرالى اقپارات تارادى، دەپ حابارلايدى "ادىرنا" ۇلتتىق پورتالى Oxu.Az-عا سىلتەپ.
بىرقاتار اتا-انالار WhatsApp چاتتارىندا ورىس تىلىندە ءبىلىم بەرەتىن مەكتەپتەردىڭ جابىلاتىنى تۋرالى حابار العاندارىن ايتقان.
باسىلىمنىڭ مالىمەتىنشە، ورىس مەكتەپتەرى كەزەڭ-كەزەڭىمەن جابىلادى دەگەن بولجام جاسالعان.
بۇل شەشىم ازەربايجان ءتىلىنىڭ ءبىلىم بەرۋ جۇيەسىندە نەگىزگى ءتىل رەتىندەگى ورنىن نىعايتۋ جانە بارلىق ازاماتتاردى ورتاق ءبىلىم بەرۋ كەڭىستىگىنە بىرىكتىرۋ ماقساتىندا قابىلداندى دەپ كورسەتىلگەن.
جوسپار بويىنشا، الداعى ءۇش جىلدا ورىس مەكتەپتەرى بىرتىندەپ ازەربايجان تىلىنە كوشىرىلەدى، ال مۇعالىمدەرگە قايتا دايارلاۋ كۋرستارى ۇيىمداستىرىلادى.
الايدا ازەربايجاننىڭ عىلىم جانە ءبىلىم مينيسترلىگى بۇل اقپاراتتى جوققا شىعاردى. مينيسترلىك ريا نوۆوستي اگەنتتىگىنە بەرگەن تۇسىنىكتەمەسىندە:
«بۇل جالعان اقپارات. مۇنداي مالىمەتتەر تاراتىلعان جاعدايدا تەك رەسمي دەرەككوزدەرگە سۇيەنۋ كەرەك»، – دەپ مالىمدەدى.
بۇعان دەيىن Oxu.Az جانە ربك دەرەككوزدەرى ازەربايجاندا ورىس مەكتەپتەرىن ءۇش جىل ىشىندە جابۋ جوسپارلانعانىن حابارلاعان ەدى. الەۋمەتتىك جەلىلەردە اتا-انالار مەكتەپتەردەگى چاتتار ارقىلى رەسمي حابارلاما العاندارىن ايتقان.
ساراپشىلار بۇل جاعدايدى ازەربايجان مەن رەسەي اراسىنداعى سوڭعى كەزەڭدەگى شيەلەنىسكە بايلانىستى دەپ وتىر.
