جامبىل وبلىسىندا فەلدشەردى اتىپ كەتكەن

جامبىل وبلىسىندا بايزاق اۋدانىنىڭ جەدەل جاردەم فەلدشەرى وق جاراقاتىن الدى، دەپ حابارلايدى «ادىرنا» ءتىلشىسى.

Centralmedia24 مالىمەتىنشە، وقيعا 10 شىلدە كۇنى بولعان. بايزاق اۋىلىنىڭ 25 جاستاعى تۇرعىنى 27 جاستاعى فەلدشەر تانىسىنىڭ جۇمىس ورنىنا كەلگەن. ول فەلدشەردەن دەفيبريللياتوردىڭ قالاي جۇمىس ىستەيتىنىن كورسەتۋدى سۇراعان. الايدا فەلدشەر بۇل قۇرىلعىنى قولدانۋعا بولمايتىنىن، ونىڭ قاۋىپتى ەكەنىن تۇسىندىرگەن. وسىدان كەيىن ەكەۋىنىڭ اراسىندا جانجال تۋىنداپ، اۋىل تۇرعىنى مەديتسينالىق قىزمەتكەرگە تراۆماتيكالىق قارۋدان وق اتقان.

وبلىستىق دەنساۋلىق ساقتاۋ باسقارماسى جارالانعان ادامنىڭ جاعدايى تۇراقتى ەكەنىن جەتكىزدى.

«ناۋقاستىڭ دياگنوزى – سول جاق كەۋدەنىڭ الدىڭعى قابىرعاسىنا تيگەن وق جاراقاتى. ىشكى اعزالارى زاقىمدانباعان. جاعدايى تۇراقتى، ورتاشا اۋىر. قازىر پاتسيەنت ديناميكالىق باقىلاۋدا»، — دەدى باسقارمانىڭ ءباسپاسوز قىزمەتى.

جامبىل وبلىستىق پوليتسيا دەپارتامەنتى بۇل جايتقا بايلانىستى قر قىلمىستىق كودەكسىنىڭ 293-بابىنىڭ 3-بولىگى (قارۋدى قولدانۋ ارقىلى جاسالعان بۇزاقىلىق) بويىنشا قىلمىستىق ءىس تىركەلگەنىن حابارلادى.