جامبىل: جارىلىستان مەزى بولعاندار باسقا جەرگە كوشىرۋدى تالاپ ەتۋدە

997

جامبىل وبلىسىنداعى اسكەري بولىمدەگى جارىلىستان مەزى بولعان قاينار اۋىلىنىڭ تۇرعىندارى بيلىكتەن باسقا جەرگە كوشىرۋدى تالاپ ەتىپ وتىر، دەپ حابارلادى “ادىرنا” ۇلتتىق پورتالى كتك.تەلەارناسىنا سىلتەمە جاساپ.

ولار 10 قازاندا بولعان جارىلىستان قاتتى شوشىنىپ قالعان.

10 قازاندا تاڭعى ساعات جەتى شاماسىندا بايزاق اۋدانىنداعى اسكەري بولىمدە تاعى دا جويقىن جارىلىس بولدى. "گۇرس" ەتكەن داۋىستى ەستىگەن تۇرعىندار ۇيقىدان تۇرا سالا جان-جاققا قاشا جونەلگەن. كەيىن ءبارى باسىلعان سوڭ باسپانالارىنا قايتا ورالدى.

ال شۇعىل جينالعان اسكەريلەر مەن شەنەۋنىكتەر جۇرتتى سابىرعا شاقىرىپ الەككە ءتۇستى. ولاردىڭ سوزىنە سەنسەك، بۇرىنعى ورتتەن زاقىمدالعان وق-دارىلەر جارىلعان.

بۇعان دەيىن دە الاڭداماۋعا شاقىرعان بيلىك وكىلدەرىنىڭ سوزىنە تۇرعىندار ەندى كۇمانمەن قارايدى.

"جارىلىس تاعى قايتالاناتىن بولسا، ءبىزدى كوشىرسىن باسقا جاققا. اقىرى وزدەرى سەنىمسىز. كوشىرسىن، بۇل جەردە تۇرمايمىز. قالاتىندار قالا بەرسىن، اركىمنىڭ ءوز ەركى", - دەيدى اۋىل تۇرعىنى جانار سۇيىندىكوۆا.

رەسمي مالىمەتكە سۇيەنسەك، ەشبىر ادام جاراقات الماعان جانە ەشقانداي عيراماتقا زاقىم كەلمەگەن. بىراق تۇرعىندار كەيبىر ءۇيدىڭ تەرەزەلەرى سىنعانىن كورسەتتى.

جەرگىلىكتى بيلىك جۇرتقا قاۋىپ بار ەكەنىن تۇسىنگەن ءتارىزدى. ويتكەنى قاينار اۋىلىنان تۇرعىندار تۇگەل شىعارىلعان. 37 ادام تۋىستارىن پانالاۋعا ءماجبۇر. ءتىپتى ەلدىمەكەندەگى قيراعان باسپانالاردى قالپىنا كەلتىرۋ جۇمىستارى دا ۋاقىتشا توقتادى.

"قارقىندى جۇمىس جۇرگىزىلىپ جاتىر. جوسپارلى جارىلىستار بولۋى دا مۇمكىن. سوعان بايلانىستى ازىرگە تۇرعىنداردى ىشكە كىرگىزبەيمىز. ياعني ءبىر مەزەتتە ۇيىندىلەردى جارۋ بويىنشا شارالار قابىلدانىپ جاتىر. تاۋ بولىپ ۇيىلگەن زاقىمدالعان وق-دارىلەردى جويىپ جىبەرۋ كوزدەلگەن. الايدا ول ءۇشىن قۇرىلعان ارنايى كوميسسيا شەشىم شىعارۋعا ءتيىس. تەك سودان كەيىن جۇمىس جۇزەگە اسىرىلادى", - دەيدى بايزاق اۋدانى اكىمىنىڭ ورىنباسارى قايرات يسمايىل. 

ال ازىرگە اۋىل تۇرعىندارى جاقىندارىنىڭ ۇيىندە جۇرە بەرەدى. قاشان ءوز ۇيلەرىنە ورالاتىنى بەلگىسىز.

اسكەري ءبولىمنىڭ ماڭىنا قازىر ەشكىمدى جولاتپاي جاتىر. قاۋىپسىزدىك شارالارى كۇشەيتىلگەن. قاينار اۋىلىنا كىرە بەرىستە بولوك-بەكەتتەر قويىلىپ، پوليتسەيلەر ەرتەلى كەش كۇزەتىپ تۇر.

”ادىرنا” ۇلتتىق پورتالى

پىكىرلەر
ۇقساس جاڭالىقتار
Серіктестер/Партнеры
Студия IMA - создание сайтов Доставка цветов Астана - Lova Buket