8 ماۋسىم كۇنى وزبەكستاننىڭ قاشقاداريا وبلىسى قارشي اۋدانىنداعى گاز قۇيۋ بەكەتىندە جارىلىس بولدى. توتەنشە جاعداي ناتيجەسىندە 6 ادام قازا تاۋىپ، تاعى 5 ادام ءتۇرلى جاراقاتپەن اۋرۋحاناعا جەتكىزىلدى. بۇل تۋرالى ەلدىڭ توتەنشە جاعدايلار مينيسترلىگى ايتتى، دەپ حابارلايدى «ادىرنا» ءتىلشىسى.
وقيعا تۋرالى حابار جەرگىلىكتى ۋاقىتپەن 13:50-دە «چامان» ماحاللاسىنداعى گاز قۇيۋ بەكەتىنەن تۇسكەن. اپات ورنىنا كوپ ۇزاماي بەس ءورت ءسوندىرۋ توبى جەتكەن. مينيسترلىكتىڭ مالىمەتىنشە، ءورت 14:05-تە وقشاۋلانعانىمەن، تولىق ءسوندىرۋ جۇمىستارى تەك ءبىر ساعاتتان كەيىن اياقتالعان.
الدىن الا اقپارات بويىنشا، ءورت سالدارىنان ەكى Chevrolet Cobalt اۆتوكولىگى، ەكى گاز تاسيتىن كولىك جانە جانارماي ساقتايتىن ەكى جەر استى رەزەرۆۋارى زاقىمدانعان.
وزبەكستان پرەزيدەنتى شاۆكات ميرزيوەۆتىڭ تاپسىرماسىمەن ۆيتسە-پرەمەر اچيلباي راماتوۆ باسقاراتىن ۇكىمەتتىك كوميسسيا قۇرىلدى. بۇل ورگان زارداپ شەككەندەرگە كومەك كورسەتۋ، جارىلىستىڭ سالدارىن جويۋ، وقيعانىڭ سەبەپتەرىن انىقتاۋ جانە مۇنداي جاعدايلاردىڭ الدىن الۋ ماسەلەلەرىمەن اينالىسادى.
قازىرگى ۋاقىتتا ءورت بولعان اۋماق باقىلاۋعا الىنىپ، اپات سالدارىن جويۋ جۇمىستارى جالعاسۋدا. جارىلىستىڭ ناقتى سەبەبى زەرتتەلىپ جاتىر.
ايتا كەتەيىك، قاشقاداريادا مۇنداي وقيعا العاش رەت بولىپ وتىرعان جوق. وتكەن جىلدىڭ شىلدە ايىندا ء«ولتيندالا» گاز قۇيۋ ستانتسياسىندا جارىلىس بولعانى حابارلانعان ەدى. ول كەزدە قايعىلى وقيعا ءتورت ادامنىڭ ءومىرىن قيعان.
مامانداردىڭ بولجامىنشا، ورتكە جانارماي ساقتايتىن رەزەرۆۋاردىڭ جارىلىسى سەبەپ بولعان. كەيىن وسى وقيعا بويىنشا قۇقىق قورعاۋ ورگاندارى «لاۋازىمدى وكىلەتتىگىن اسىرا پايدالانۋ» جانە ء«ورت قاۋىپسىزدىگى ەرەجەلەرىن بۇزۋ» باپتارى بويىنشا قىلمىستىق ءىس قوزعاعان.
